Krahasim i Shfletues Firefox-it me Brave-in

Siguri dhe Privatësi
Mënyra Shfletim Privat
Bllokon, si parazgjedhje, cookie-t nga palë gjurmuese të treta
Bllokon programthe nxjerrjeje kriptomonedhash
Bllokon gjurmues shoqërorësh

Shfletuesi Brave, si aq shumë të tjerë, ngrihet mbi kodin me burim të hapur të Chromium-it të Google-it. Me burim të hapët do të thotë që cilido mund të përdorë kodin burim dhe të ecë kaliqafë mbi të për të krijuar ç’të duan — si puna e shfletuesve Opera dhe Edge. Por s’do të thotë se krejt shfletuesit me bazë Chromium janë të barabartë apo se janë edhe ata me burim të hapur.

Brave dallon nga shfletuestë tjerë Chromium nga përqendrimi te privatësia e shfletuesit — më hollësisht, nga bllokimi, si parazgjedhje, i gjurmuesve, programtheve dhe reklamave. Ndaj, kur përdorni shfletuesin Brave, fusha të një sajti, që normalisht do të shfaqnin reklama, do të duken si fusha të zbrazëta. Në disa raste, faqet s’do të ngarkohen si duhet, çka do të kërkojë që ose të zgjidhni një shfletues tjetër ose të kaloni nga rregullimi ‘Mburojat Ngritur’ te ai ‘Mburojat Ulur’ që çaktivizon privatësinë dhe mbrojtjen e sigurisë.

Interneti si tërësi paguhet në një masë të madhe për shfaqje reklamash, çka e mban lëndën faktike falas për parje. Brave ka tentuar ta ngrejë këtë model, duke i nxitur përdoruesit e tij të zgjedhin pjesëmarrje në sistemin Brave të shpërblimeve, që në realitet, është platforma e tyre e reklamave. Pasi përdoruesi të ketë zgjedhur kështu, Brave do të shfaqë ato që ata i quajnë “reklama që respektojnë privatësinë”, të cilat mund t’i shihni dhe të fitoni nga kjo atë që e quajnë Basic Attention Token, e thënë ndryshe, një BAT. Nga kjo pikë, përdoruesit e Brave-it mund të zgjedhin t’i shpenzojnë BAT-et e tyre për përkrahje sajtesh ose kontribuesish individualë që duan, të cilët nga ana e tyre mund t’i shndërrojnë BAT-et në monedhë faktike.

Nëse kjo duket e ndërlikuar, apo si ide e fuqishme, varet sipas gjasash nga shkalla juaj e përçmimit për shfaqje reklamash në Internet. Shumica e përdoruesve të Internetit e kuptojnë se lënda me vlerë kushton para dhe janë dakord me faktin që paratë për këtë vijnë nga reklamat.

Nga ana tjetër, me shfletuesin Firefox, parapëlqejmë t’i mbajnë gjërat të thjeshta. Firefox-i bllokon, si parazgjedhje, ndjekjen tuaj nga mjaft gjurmues palësh të treta, nxjerrës kriptomonedhash dhe ndjekës për krijim profilizimesh. Megjithatë, Firefox-i, jashtë Mënyrës Shfletim Privat, zgjedh të mos bllokojë shfaqjen e reklamave. Veç në instalofshi një nga zgjerimet e konceptuara posaçërisht për këtë qëllim.

Në Brave ka pak veçori sigurie që ia vlen të theksohen, të tilla si kalimi i vetvetishëm në lidhje HTTPS (të cilin Firefox-i e ofron përmes një zgjerimi). Si Brave-i, ashtu edhe Firefox-i u ofrojnë përdoruesve një përgjegjës të brendshëm fjalëkalimesh dhe aftësinë për parje të statistikave të sigurisë në çfarëdo kohe. Brave-i i shfaq statistika si numrin e gjurmuesve që ka bllokuar, kurdo që hapni një skedë të re. Firefox-i shfaq të dhëna të ngjashme, kur shihni raportin tuaj të privatësisë, që mund të hapet në çfarëdo kohe duke klikuar mbi mburojën te shtylla e adresave.

Thelbi është që, edhe pse modeli i të ardhurave të Brave-it me Basic Attention Tokens mund të jetë shumë i ndërlikuar për një masë të madhe përdoruesish, përgjithësisht që të dy, shfletuesit Brave dhe Firefox ofrojnë një larmi rrugësh për të shijuar punë shfletimi të parrezik dhe privat.