Përdorues të Windows-it për 64-bit të cilët shkarkojnë Firefox-in mund të marrin, si parazgjedhje, versionin tonë 64-bit. Kjo do të thotë se merrni një version më të sigurt të Firefox-it, një që gjithashtu vithiset shumë më pak. Sa më pak? Në provat tona deri këtu, Firefox-i 64-bit i ul vithisjet me 39%, në makina me 4GB RAM ose më tepër.
Cili është dallimi me 32-bitëshit dhe 64-bitëshit?
Ja pika kyçe që duhet ditur: aplikacionet 64-bitëshe mund të përdorin më tepër kujtesë dhe kanë më pak gjasa të vithisen, se sa ato 32-bitëshe. Gjithashtu, me kalimin prej 32 te 64 bite, një veçori sigurie, e quajtur Address Space Layout Randomization (ASLR) funksionon më mirë, për t’ju mbrojtur nga agresorë. Përdorues të Linux-it dhe macOS-it, mos u merakosni, shijoni tashmë një Firefox që është optimizuar për 64-bit.
Si mund të merrni Firefox 64-bitësh?
Nëse xhironi Windows 64-bit (ja se si të shihni versionin), Firefox-i juaj mund të jetë tashmë 64-bit. Shihni versionin tuaj të Firefox-it (te dritarja “Mbi Firefox-in”) dhe shihni për “(32-bit)” ose “(64-bit)” pas numri të versionit:
- Nëse shihni “(32-bit)” dhe xhironi Firefox 56.0 ose më të vjetër, përditësimi me versionin më të ri të Firefox-it do të duhej ta përmirësonte automatikisht në 64-bit.
- Nëse shihni “(32-bit)” dhe xhironi Firefox 56.0.1 ose më të ri, atëherë kompjuteri juaj mund të mos plotësojë domosdoshmëritë minimum mbi kujtesën për 64-bit (3 GB RAM ose më tepër). Mundni ta instaloni Firefox-in 64-bitësh edhe dorazi, nëse doni.