Известување за приватност за веб-локации, комуникации и колачиња

Што треба да знаете

Може да примаме лични информации за вас според вашата интеракција со нас на платформите на друштвените медиуми; ако испратите апликација за вработување, за практикантска работа или за стипендија; ако сте волонтер како член на заедницата на Mozilla; ако ни испратите барање или повратни информации како корисник; ако регистрирате сметка; или ако се ангажирате во некој производ или кампања за политики.

• Друштвени медиуми: Ако сте активни на нашите сметки на друштвените медиуми, на пр. на Twitter и Facebook, можно е да добиваме лични информации за вас. Ако ги користите овие друштвени мрежи, треба да знаете дека за нив важат нивните политики за приватност и ве советуваме да ги прочитате.

• Кандидати за вработување, практикантска работа и стипендија: Од кандидатите за вработување, практикантска работа или стипендија во Mozilla се бара да ни достават име, адреса, телефонски број, адреса на е-пошта и кратка биографија. Овие информации ги користиме за да ги обработуваме и да ги оценуваме апликациите и за да комуницираме со кандидатите околу можностите што ги нудиме. Во обработката на апликациите за вработување ни помага независен давател на услуги. Повеќе информации околу обработката на податоци преку независни даватели на услуги (трети страни) може да најдете во Политиката за приватност на Mozilla.

• Соработници: Вашето доброволно работење за Mozilla како член на заедницата може да подразбира Mozilla и други лица да комуницираат со вас преку адресата на е-пошта што ја имате дадено во врска со вашата соработка, но и со цел да ви оддадеме признание за вашите напори. Ако придонесувате за Bugzilla, Mozilla Reps или за нашата база на кодови, тогаш вашата адреса на е-пошта, а веројатно и вашето име ќе им бидат јавно достапни на сите корисници на интернет. Ако создадете профил на Mozillians.org, до него ќе имаат пристап вработените на Mozilla и соработниците на Mozilla. Податоците за вашиот профил може да ги менувате во Поставки за профил. Понекогаш користиме информации за соработниците од извори (како на пример Bugzilla) на информативните табли, за да ги споделуваме собраните податоци визуелно со заедницата на Mozilla. Пример за тоа е https://wiki.mozilla.org/Contribute/Dashboards. Ако е можно, се обидуваме да ги сведеме на минимум информациите за контакт што се јавно достапни.

• Повратни информации од корисниците: Може да ни испраќате повратни информации за нашите производи и услуги на веб-страници како што е input.mozilla.org, преку самиот производ или преку канали како што се е-пошта, Bugzilla, IRC, сметка на друштвен медиум, преку нашата страница Get Involved или преку групата Student Ambassadors. Сведете ги на минимум личните информации што ги споделувате на овие форуми, бидејќи вашите коментари можеби ќе бидат јавно достапни.

• Сметки: Некои веб-локации, како што се Marketplace, AMO, MDN и Webmaker, бараат да создадете сметка за да можете да испраќате програмерски содржини, кориснички рецензии или коментари, или за да инсталирате одредени типови апликации. Може повремено да примате е-пораки во врска со вашата сметка.

• Кампањи за производи и политики: На некои од нашите веб-страници се претставени кампањи за производи или политики. На пример, може да побарате линк преку е-порака или SMS за да инсталирате Firefox на мобилниот уред или за да поднесете петиција до вашите законодавци за прашања поврзани со интернетот. За управување со овие кампањи и за ракување со податоците што ни ги испраќате користиме услуги од трети страни.

Можно е да користиме колачиња, невидливи GIF-датотеки, веб-аналитика од трети страни, информации за уредот, како и IP-адреси со цел да ја подобриме функционалноста и да имаме подобра претстава за интеракцијата на корисниците со нашите производи, услуги и комуникации.

• Функционалност: Може да користиме информации како што се колачиња, информации за уредот и IP-адреси со цел да ја подобриме функционалноста на одредени производи, услуги и комуникации. На пример:

  • Колачињата се користат за да ги помнат информациите за вашите поставки за Firefox (како што е поставката за јазикот и додатоците за Firefox), но и за да можеме да ви препорачуваме релевантни функции и додатоци според вашите поставки за Firefox. Тие ви помагаат и при најавувањето и автентикацијата, за да не мора постојано да ги внесувате лозинките во одредени веб-локации на Mozilla.
  • IP-адресите ги користиме за приспособување на комуникациите според јазикот и земјата.
  • За да ви го приспособиме доживувањето, користиме одредени информации за уредот, како што се земјата, јазикот, операторот и производителот на опремата.

• Метрика: Исто така, може да користиме колачиња, информации за уредот и IP-адреси, како и невидливи GIF-датотеки и услуги од трети страни за да добиеме генерална претстава за тоа како корисниците ги користат нашите производи, услуги, комуникации, веб-локации, онлајн-кампањи, исечоци, уреди и други платформи. Користиме:

  • Google Analytics, којашто поставува колаче на вашиот уред, за да добиваме метрика во врска со начинот на кој корисниците ги користат нашите веб-локации. Ова ни помага да ги подобруваме содржините на веб-локациите.
  • Optimizely и ShareProgress, коишто поставуваат колаче на вашиот уред, за да ни помогнат да ги тестираме варијациите на веб-содржините. Ова ни помага да им понудиме подобри веб-доживувања на корисниците.
  • DoubleClick и Flashtalking, коишто користат невидлива GIF-датотека во нашата страница за преземање на Firefox. Ова ни помага да ја мериме ефикасноста на нашите рекламни кампањи.
  • Yahoo Dot Pixel, којшто користи JavaScript во нашата страница за преземање на Firefox. Ова ни помага да ја мериме ефикасноста на нашите рекламни кампањи.
  • Податоци за HTTP-упатување, коишто може да бидат вклучени со инсталаторот на Firefox, за да дознаеме кој домен на веб-локација или рекламна кампања ве упатиле кон нашата страница за преземање. Овие информации ни помагаат да ја мериме ефикасноста на нашите рекламни кампањи и да ги подобруваме.
  • Повремено и други алатки за метрика, на експериментална основа. На пример, ова може да го правиме за да оцениме нова алатка за метрика или за да ги тестираме постојните алатки за метрика.

Може да контролирате поставки за поединечни колачиња, да им ги покажете поставките за колачињата на други лица и да се откажете од користење алатки за веб-аналитика и оптимизација.

• Историја на колачиња: Може да прифаќате или да одбивате поединечни колачиња во поставките за Firefox, во секцијата „Историја“, во „Алатки/Опции/Приватност“. Имајте предвид дека одредени функции на нашите производи и услуги можеби нема да функционираат правилно без колачиња.

• Без следење: Mozilla не ги следи корисниците на веб-локациите на трети страни за да нуди насочено рекламирање. Ако сте го конфигурирале прелистувачот да испраќа сигнал „Без следење“ (Do not Track) кога пристапувате на нашите веб-локации, Mozilla нема да користи ниту една од алатките опишани во секцијата Метрика.

• Е-пошта: Приемот на нашите рекламни комуникации не е задолжителен и може да се откажете преку подножјето на е-пораката или со ажурирање на вашите поставки за е-пошта за Mozilla.

• Аналитика и оптимизација: За да спречите собирање податоци за вашите посети на веб-локациите на Mozilla, следете ги инструкциите подолу:

  • Google: Инсталирајте го додатокот за прелистувачи за откажување од Google Analytics, со којшто вашите посети остануваат анонимни и се забранува пренос на податоци до Google Analytics. Некои страници на Mozilla.org користат невидливи GIF-датотеки коишто комуницираат со DoubleClick за да ја мериме ефикасноста на нашите рекламни кампањи; може да ги контролирате персонализираните реклами од DoubleClick во поставките за реклами на Google (ќе ви биде побарано да се најавите на вашата сметка на Google).
  • Optimizely: Откажете се на www.mozilla.org или посетете ја веб-локацијата за откажување на Optimizely за повеќе информации.
  • Yahoo: одете на Ad Interest Manager за да се откажете.
  • ShareProgress: Може да ја вклучите функцијата „Без следење“ во вашиот прелистувач.

• Друштвени медиуми: Копчињата во веб-локациите на Mozilla што служат за споделување содржини на друштвените медиуми се дизајнирани така што не споделуваат податоци со друштвениот медиум, освен ако го кликнете соодветното копче.

Некои веб-локации на Mozilla ви овозможуваат да купувате (на пр. апликации или опрема) или да донирате. Овие трансакции ги обработуваат трети страни, а не Mozilla.

• Обработка на плаќањата: Mozilla не прима никакви финансиски информации што се пренесуваат од вас до нашите даватели на услуги (трети страни) за обработка на плаќања. Името на третата страна ќе се прикаже при трансакцијата.

• Спречување измами: Mozilla ја воведе технологијата Invisible reCAPTCHA од Google, којашто работи во заднината на некои од нашите веб-локации за да открива измамнички активности. За користењето на Invisible reCAPTCHA важат Политиката за приватност и Условите за користење на Google.