Sche ti utiliseschas in Mac u sche ti has in iPhone es ti probablamain famigliar cun il navigatur Safari. Cunquai che quel è preinstallà sco navigatur da standard sin products dad Apple ha el in avantatg visavi Firefox che porscha dentant da sia vart insaquantas funcziuns nizzaivlas grazia a las qualas el è in'alternativa attractiva. Firefox po ussa era vegnir definì sco navigatur da standard sin tes Mac ed iPhone. Qua analisain nus las differenzas las pli impurtantas tranter noss navigatur e Safari areguard la protecziun da datas, l'utilitad e la portabilitad sin ils differents apparats.
Segirezza e protecziun da datas
| Segirezza e protecziun da datas |  |
 |
|---|---|---|
| Modus da navigaziun privata |  |
|
| Blochescha cookies da terzas partidas che fastizeschan gia en la configuraziun predefinida | |
|
| Blochescha scripts criptominiers | |
 |
| Blochescha fastizaders da social media | |
|
La protecziun da datas è daventà in tema brisant per las interpresas dal sectur da tecnologia perquai ch'ellas chapeschan pli e pli che la glieud sa senta periclitada da pannas da datas, fastizaders da reclama e hackers. Ma sch'i va per utensils concrets per navigar en il web, restan las empermischuns vanas u prendan ellas propi mesiras per proteger tias datas?
Sco menziunà sisur è Apple ina da las interpresas che ha decis avant pauc temp dad optimar sias mesiras per la protecziun da datas. Dacurt ha Apple implementà ina funcziun da protecziun cunter fastizaders interpaginals en Safari che impedescha che reclamas ta suondan tras la rait. Safari fa era propostas per buns pleds-clav sche ti avras in nov conto sin x ina pagina-web. E sche ti es integrà en l'ecosistem iCloud, sincronisescha quel tes pled-clav a moda segira cun tes auters apparats, uschia che ti n'al stos betg tegnair endament.
Sco Safari avain nus da Firefox dà gronda paisa a la protecziun da datas ed a la segirezza. En cuntrast cun Safari è la protecziun da la sfera privata stada per nus da bell'entschatta in intent essenzial. Per propi è Mozilla (nossa societad-mamma) stada ina da las emprimas vuschs che han fatg attent la community tecnologica cun vehemenza al basegn da proteger las datas en l'internet.
Noss modus da navigaziun privata blochescha fastizaders e stizza tes pleds-clav, cookies e tia cronologia mintga giada che ti serras il navigatur. Ma ti pos perfin profitar da nossas funcziuns avanzadas per la protecziun da datas cura che ti navigheschas en il modus normal. En la versiun la pli nova da Firefox è la protecziun avanzada cunter fastizaders activada en la configuraziun predefinida. Quai impedescha che elements mulestus sco fastizaders interpaginals ta suondian dad ina pagina-web a l'autra durant che ti navigheschas. Cunquai che Facebook vegn traplà quasi mintga di cun ina panna da datas, ha nossa extensiun Facebook Container tant dapli senn. Grazia a quella èsi daventà pli difficil per Facebook da ta suandar tras il web – sumegliant a quai che Safari fa per bloccar fastizaders che ta suondan dad ina pagina-web a l'autra. Firefox isolescha dentant propi tia sesida da Facebook en in container separà ed impedescha uschia che Facebook possia t'observar sin autras paginas-web. Pertge pomai duain els savair tge che ti tschertgas sin admin.ch?
Dal punct da vista da la segirezza è era Firefox solid. Mintga giada che ti es en Firefox pos ti cliccar sin la tasta dretga da la mieur per generar in ferm pled-clav cun l'opziun per emplenir pleds-clav en formulars. Cura che ti memoriseschas tes nov pled-clav vegns ti supplitgà d'al memorisar en Lockwise, l'administraziun per pleds-clav integrada. Nus purschain a noss utilisaders che han in conto er in ulteriur product gratuit e nizzaivel numnà Monitor. Quel t'avertescha automaticamain sche tias datas èn pertutgadas dad ina panna da datas enconuschenta.
Sche ti ta decidas per Safari es ti en mauns segirs entant che ti utiliseschas in apparat dad Apple. Ma Safari funcziuna mo sin apparats dad Apple, Firefox percunter funcziuna sin Windows, macOS, iOS, Android e Linux. Independentamain dal sistem operativ che ti utiliseschas, cun Firefox profiteschas ti da nossa protecziun da datas e las funcziuns da segirezza.
Funcziunalitad
| Funcziunalitad | |
|
|---|---|---|
| Bloccada da la reproducziun automatica | |
|
| Navigaziun cun tabs | |
|
| Administraziun da segnapaginas | |
|
| Emplenescha automaticamain formulars | |
|
| Opziuns per maschinas da tschertgar | |
|
| Sintesa vocala | |
|
| Modus da lectura | |
|
| Correctura ortografica | |
|
| «Web extensions»/supplements | |
|
| Utensil integrà per far maletgs dal visur | |
|
Apple è enconuschent per ses ecosistem serrà che sviluppa software per ses agens products. Ma en ses App Store porscha l'interpresa ina secziun als sviluppaders per crear plugins e supplements per render pli robust il navigatur. Questas extensiuns pon era vegnir retschertgadas via l'App Store ed installadas facilmain en Safari.
Ultra da las funcziuns regularas ch'ins spetga dad in navigatur, sco la navigaziun cun tabs ed il modus privat, porscha Safari insaquantas funcziuns nunspetgadas. Per exempel questa: Sch'in utilisader clicca en Safari cun la tasta dretga da sia mieur sin in pled insanua en ina pagina-web, po el cliccar sin «consultar» e survegn ina definiziun dal dicziunari ed endataziuns dal tesaurus, resultats da l'App Store, films ed auter pli. La segiranza per uffants da Safari lascha s'adattar facilmain, uschia ch'ils creschids pon restar in zic pli calms cura ch'ils uffants cumenzan a s'interessar per l'internet.
Sco Safari intimescha era Firefox sia cuminanza entusiastica da sviluppaders da crear supplements ed extensiuns per il navigatur. E cunquai che nossa plattafurma è open-source datti ina schelta vasta che porscha funcziuns en abundanza.
Sche ti ta registreschas per in conto da Firefox, survegns ti era access a servetschs unics sco Pocket, integrads directamain en il navigatur. Il buttun Pocket per Firefox ta pussibilitescha da memorisar paginas-web e videos cun in singul clic en Pocket da maniera che ti pos leger ina versiun netta e survesaivla senza distracziuns nua e cura ch'i saja – schizunt offline.Firefox è era fitg adattà per video ed audio. Grazia ad ina funcziun integrada ed activada gia en la configuraziun da standard vegn la reproducziun automatica bloccada, uschia che ti na vegns betg mulestà da websites che cridan u giappan senza vegnir dumandadas.
Screenshots è in'ulteriura funcziun integrada directamain en il navigatur Firefox che ta pussibilitescha a moda simpla da far in maletg da tes visur. Sche ti fas in maletg dal visur, pos ti tscherner sche ti vuls copiar il cuntegn u selecziunar in ordinatur per al memorisar ed uschia evitar ina babilonia sin tes desktop.
Domadus navigaturs han tant massa funcziuns cuminaivlas sco era insaquantas funcziuns unicas. Sche ti fas blers maletgs dal visur ta dumondas ti prest co che ti has pudì viver tut il temp senza questa funcziun pratica integrada en Firefox. Ma sche ti tschertgas simplamain in navigatur svelt e privat per navigar e far cumpras, duessas ti empruvar ina giada Firefox – tant pli sche ti has utilisà enfin ussa exclusivamain Safari perquai che quel era gia preinstallà sco navigatur da standard sin tes computer. La fin finala vegns ti ad eruir tge navigatur ch'è il pli adattà per tes basegns.
Portabilitad
| Portabilitad | |
|
|---|---|---|
| Disponibel per blers sistems operativs | |
|
| Disponibel era per sistems operativs mobils | |
|
| Sincronisaziun cun apparats mobils | |
|
| Administraziun da pleds-clav | |
|
| Pled-clav universal | |
|
Tant Firefox sco era Safari ta permettan da midar senza interrupziun da la navigaziun sin il desktop a quella cun l'apparat mobil e viceversa. Ina da las fermezzas essenzialas da Safari èn sias funcziuns da cuntinuitad. El sincronisescha tes segnapaginas, tabs, tia cronologia ed auter pli cun l'iCloud da maniera che tut è accessibel sin mintgin da tes apparats. Quai munta che ti pos avrir in tab sin tes iPhone che stat lura era a disposiziun sin tes laptop da macOS cun in singul clic.
Firefox porscha era ina funcziun sumeglianta da sincronisaziun sche ti avras in Firefox Account gratuit che pussibilitescha da sincronisar facilmain ils segnapaginas, la cronologia, las preferenzas, ils pleds-clav, ils formulars emplenids, ils supplements ed il davos 25 tabs averts sin plirs computers. Quai che differenziescha Firefox da Safari è ch'el stat a disposiziun sin mintga plattafurma da computer u apparat mobil, saja quai iOS, Android, Windows u macOS. Uschia profiteschas ti sco utilisadra u utilisader da la portabilitad optimala per mintga apparat che ti possedas.
L'applicaziun Firefox per iOS ed Android è actualmain in dals navigaturs ils pli sperts sin il martgà ed ha ultra da quai funcziuns solidas da segirezza e cunter fastizaders – in enorm avantatg sche ti midas adina puspè tranter in laptop ed apparats mobils.
Cunquai che Safari è il navigatur proprietar da Apple, funcziunescha la sincronisaziun da sia iCloud mo cun products dad Apple. Quai pudess esser en tscherts cas in impediment, per exempel sche ti utiliseschas tant Android sco era in iPhone u sche ti has in PC che funcziunescha sin basa da Windows per lavurar, ma in iPhone per il diever privat.
Evaluaziun cumplessiva
Safari ta porscha a moda excellenta ina navigaziun simpla, svelta e senza interrupziun, sche ti es in utilisader dad Apple cun plirs products dad Apple. Sco Safari è era Firefox in navigatur svelt e nizzaivel, ma nossa fermezza èn la protecziun da datas e la cumpatibilitad cun differentas plattafurmas. Firefox vegn actualisà mintga mais cun novas funcziuns ed utensils. Ina da las actualisaziuns las pli novas ha per exempel activà automaticamain nossa protecziun avanzada cunter il fastizar en novas installaziuns. Questa funcziun blochescha a moda effectiva cookies e fastizaders interpaginals.
La fin finala dependi da tge che ti spetgas da tes navigatur. Sche ti es integrà en l'ecosistem dad Apple è Safari anc adina ina buna schelta. Ma sche ti das paisa a la meglra protecziun da datas la pli nova e vulessas lavurar sin plirs sistems operativs è Firefox tenor noss avis la meglra soluziun per tai. Firefox è era in'opziun solida sco navigatur secundar per quellas e quels che utiliseschan exclusivamain products da Apple, ma vulessan midar sin in auter navigatur per muments en l'internet che pretendan mesiras spezialas da la protecziun da datas.
La cumparegliaziun è vegnida fatga mintgamai cun la configuraziun da standard, a basa da las suandantas versiuns dals navigaturs examinads:
Firefox (81) |
Safari (14)
Questa pagina vegn actualisada duas giadas per quartal per evaluar las novas versiuns. Eventualmain na resguarda ella dentant betg las actualisaziuns las pli novas.