Sco il navigatur Firefox è era Brave gratuit, open source e focussà sin la protecziun da datas dals utilisaders. Brave è relativamain nov en il mund dals navigaturs: la sviluppadra, Brave Software, ha lantschà il navigatur il schaner 2016. En quest artitgel cumparegliain nus noss navigatur Firefox cun il navigatur Brave en trais categorias: protecziun da datas, utilisabladad e portabilitad.
Segirezza e protecziun da datas
| Segirezza e protecziun da datas |  |
 |
|---|---|---|
| Modus da navigaziun privata |  |
|
| Blochescha cookies da terzas partidas che fastizeschan gia en la configuraziun predefinida | |
|
| Blochescha scripts criptominiers | |
|
| Blochescha fastizaders da social media | |
|
Il navigatur Brave sa basa sco blers auters sin il code open source da Chromium, sviluppà da Google. Open source vul dir che mintgin po utilisar il code da funtauna e construir lasur tge ch'i saja — uschia èn naschids ils navigaturs Opera ed Edge. Ma quai na vul betg dir che tut ils navigaturs che sa basan sin Chromium sajan eguals u sajan sez mintgamai open source.
Brave sa distingua dals auters navigaturs basads sin Chromium grazia a ses focus sin la protecziun da datas — spezialmain cun bloccar fastizaders, scripts e reclamas gia en la configuraziun predefinida. Cun utilisar il navigatur Brave vegnan mussadas zonas vidas en quels lieus nua che reclamas cumparessan normalmain. Mintgatant na vegnan paginas betg chargiadas endretg; en quest cas ston ins duvrar in auter navigatur u deactivar la protecziun da las datas e da la segirezza cun agid da l'icona dal scut.
Ina gronda part da l'internet vegn finanziada cun reclamas che permettan ch'il cuntegn ch'ins vul atgnamain vesair è gratuit. Brave ha empruvà dad invertir quest model cun encuraschar ses utilisaders da participar ad in sistem da remuneraziun ch'è en sasez in'atgna plattafurma da reclama. Uschespert che l'utilisader sa participescha, mussa Brave uschenumnadas «reclamas che resguardan la sfera privata». Cun laschar mussar questas reclamas pon ins gudagnar in Basic Attention Token (BAT). Suenter pon utilisaders da Brave spender lur BATs cun sustegnair websites u persunas ch'els apprezieschan. Quels pon puspè midar ils BATs en ina valuta normala.
È quai simplamain cumplitgà u in'idea grondiusa? La resposta dependa probablamain da quanta fadia che ti has cun reclamas en l'internet. La gronda part dals utilisaders chapeschan che bun cuntegn custa ed acceptan il fatg ch'ils daners derivan da la reclama.
Da l'autra vart preferin nus per il navigatur Firefox la via simpla. Firefox blochescha gia en sia configuraziun predefinida blers fastizaders da terzas partidas, criptominiers e fastizaders che lavuran cun improntas per evitar uschia ch'els ta suondian. Tuttina na blochescha Firefox ordaifer il modus privat betg las reclamas. Nun che ti installeschias ina extensiun sviluppada per exact quest intent.
I dat insaquantas funcziuns da segirezza en Brave degnas da vegnir menziunadas sco p.ex. la midada automatica a colliaziuns HTTPS che Firefox porscha era via extensiun. Brave e Firefox porschan domadus ina administraziun nativa da pleds-clav e la pussaivladad dad examinar permanentamain las statisticas da segirezza a lur utilisaders. Brave mussa adina statisticas sco il dumber da fastizaders bloccads cura che ti avras in nov tab. Firefox mussa infurmaziuns sumegliantas sche ti avras tes rapport davart la protecziun da datas che ti pos adina consultar cun cliccar sin il scut en la trav d'adressas.
Conclusiun: Era sch'il model economic da Brave cun ils Basic Attention Token pudess esser memia cumplitgà per blers utilisaders, porschan tant il navigatur Brave sco era Firefox diversas pussaivladads per giudair la navigaziun en segirezza e cun la sfera privata garantida.
Funcziunalitad
| Funcziunalitad | |
|
|---|---|---|
| Bloccada da la reproducziun automatica | |
|
| Navigaziun cun tabs | |
|
| Administraziun da segnapaginas | |
|
| Emplenescha automaticamain formulars | |
|
| Opziuns per maschinas da tschertgar | |
|
| Sintesa vocala | |
 |
| Modus da lectura | |
|
| Correctura ortografica | |
|
| «Web extensions»/supplements | |
|
| Utensil integrà per far maletgs dal visur | |
|
Quai che pudess far surstar novs utilisaders da Brave è la sveltezza cun la quala il navigatur chargia las paginas-web. Il motiv per il tempo è ch'i va bler pli spert da chargiar las paginas sch'ins blochescha tut lur reclamas. Cunquai ch'i dat damain da chargiar sa reducescha er il temp per l'entira procedura.
En connex cun l'utilisaziun reala da RAM è il navigatur-web Brave bler pli exigent che Firefox. Brave cuntegna gia en sia configuraziun da standard diversas funcziuns ed «add-ons» che pretendan dapli RAM. Firefox percunter permetta a tai da decider tge supplements ed extensiuns che ti vuls installar.
La persunalisaziun dad elements da l'interfatscha d'utilisader e da designs è dapi blers onns ina funcziun preferida dals utilisaders da Firefox. Per quest scopo ha nossa cuminanza entusiastica da sviluppaders creà ina biblioteca vasta cun supplements ed extensiuns open source che permettan dapli persunalisaziun e funcziunalitad. Sche ti telechargias Firefox cuntegna il program noss utensil multifar per maletgs dal visur, funcziuns d'accessibilitad e l'integraziun da Pocket – in instrument cun il qual ils utilisaders pon memorisar spert in artitgel per al leger pli tard sin mintga apparat collià.
Brave sustegna era la biblioteca vasta dad extensiuns disponiblas en il webstore da Google Chrome e porscha diversas funcziuns da navigatur sco il program da remuneraziun da Brave surmenziunà ed ina funcziun per telechargiar torrents en il navigatur.
Portabilitad
| Portabilitad | |
|
|---|---|---|
| Disponibel per blers sistems operativs | |
|
| Disponibel era per sistems operativs mobils | |
|
| Sincronisaziun cun apparats mobils | |
|
| Administraziun da pleds-clav | |
|
| Pled-clav universal | |
|
Dapi onns porscha Firefox la pussaivladad da sincronisar pleds-clav, extensiuns, datas da formulars, supplements ed ulteriuras preferenzas sin tut tes apparats e sistems operativs. Ultra da quai vegnan las datas sincronisadas criptadas da maniera che nagin na po acceder a quellas d'ordaifer.
Il navigatur Firefox pussibilitescha als utilisaders dad avrir gratuitamain in Firefox Account. In conto da Firefox è la clav per lantschar la sincronisaziun tranter apparats. Ultra da quai profitas ti da products sco Firefox Monitor. Quest servetsch permetta da survegliar tias adressas dad e-mail e t'avertescha en cas che tias infurmaziuns èn pertutgadas da sperditas da datas enconuschentas.
Dapi dacurt ha era Brave ina funcziun per sincronisar datas tranter ils sistems operativs ed apparats ils pli derasads. Ultra da quai èsi pussaivel da sincronisar ils Basic Attention Tokens.
Evaluaziun cumplessiva
Cun cumparegliar ils dus navigaturs Firefox e Brave, vesan ins che omadus garanteschan en lur configuraziun predefinida in aut nivel da protecziun da datas e segirezza, e quai gia cun avrir l'emprima giada il program.
L'idea da Brave da remplazzar reclama munta ina midada dal model actual dal plazzament pajà e da la retschertga pajada. Dentant datti probablamain era qua insaquants utilisaders da l'internet fatschentads che n'èn betg interessads da vegnir involvids en l'administraziun da micro-pajaments a paginas-web e dar persuenter lur temp ed attenziun.
En general è Brave in navigatur svelt e segir, oravant tut interessant per utilisaders da criptovalutas. Dentant resta Firefox per la gronda part dals «vischins» da l'internet la meglra soluziun e la pli simpla.
La cumparegliaziun è vegnida fatga mintgamai cun la configuraziun da standard, a basa da las suandantas versiuns dals navigaturs examinads:
Firefox (81) |
Brave (1.14.81)
Questa pagina vegn actualisada duas giadas per quartal per evaluar las novas versiuns. Eventualmain na resguarda ella dentant betg las actualisaziuns las pli novas.