Telechargiar Firefox

Firefox na vegn betg pli sustegnì sin Windows 8.1 e pli vegl.

Telechargia per plaschair Firefox ESR (Extended Support Release) per utilisar Firefox.

Firefox na vegn betg pli sustegnì sin macOS 10.14 e pli vegl.

Telechargia per plaschair Firefox ESR (Extended Support Release) per utilisar Firefox.

Las directivas da Firefox per la protecziun da datas

Cumparegliaziun dal navigatur Firefox cun Microsoft Edge

Telechargiar Firefox

Firefox na vegn betg pli sustegnì sin Windows 8.1 e pli vegl.

Telechargia per plaschair Firefox ESR (Extended Support Release) per utilisar Firefox.

Firefox na vegn betg pli sustegnì sin macOS 10.14 e pli vegl.

Telechargia per plaschair Firefox ESR (Extended Support Release) per utilisar Firefox.

Las directivas da Firefox per la protecziun da datas

Cun Windows 10 ha Microsoft introducì ses navigatur Edge per far concurrenza a Firefox e Chrome. Quai è succedì cun preinstallar il navigatur sco standard sin milliuns PCs vendids. Perfin uschia l'han ils utilisaders acceptà mo navidas e perquai ha Microsoft annunzià la relantschada da Edge sco navigatur sin basa da Chromium (Chromium è il project da navigatur open source da Google). Il schaner 2020 ha il navigatur Edge da Microsoft che sa basa sin Chromium remplazzà las versiuns precedentas dad Edge. Schebain che Edge sa basa ussa sin Chromium da Google, sa differenziescha el grazia a tschertas funcziuns unicas dal navigatur Chrome da Google.

En quest artitgel cumparegliain nus il navigatur Firefox cun il navigatur Microsoft Edge che sa basa sin Chromium areguard la protecziun da datas, l'utilitad e la portabilitad per che ti vegnias a savair tgenin navigatur che correspunda pli fitg a tes basegns ed a tias preferenzas.

Segirezza e protecziun da datas

Segirezza e protecziun da datas Firefox Edge
Modus da navigaziun privata Gea Gea
Blochescha cookies da terzas partidas che fastizeschan gia en la configuraziun predefinida Gea Gea
Blochescha scripts criptominiers Gea Gea
Blochescha fastizaders da social media Gea Gea

Edge è integrà en la plattafurma Windows 10 e funcziunescha en in conturn da «sandbox». Quai munta ch'ils programs vegnan isolads in da l'auter per impedir che software nuschaivla possia spiunar en tes computer. Edge ha installà in SmartScreen che examinescha la reputaziun da las paginas-web che ti visitas e che blochescha paginas dubiusas. Per proteger meglier tia sfera privata ta pussibilitescha Edge dad utilisar biometrica u in PIN cun Windows Hello empè dad in pled-clav per l'autentificaziun en l'internet.

Nus da Firefox essan superbis da proteger la segirezza e la sfera privata da noss utilisaders. Nossas directivas da la protecziun da datas èn transparentas e formuladas cler e net. Nus essan sa stentads da formular las explicaziuns a moda nuncumplitgada ed en ina lingua bain chapibla. Grazia a nossa protecziun avanzada cunter fastizaders, installada sco standard, pudain nus bloccar automaticamain passa 2000 fastizaders. Fastizaders èn quels pitschens tocs da code che ta suondan tras l'internet ed analiseschan tut tias activitads per crear cun las datas rimnadas in profil cumplet e detaglià da tai. Quai violescha tia sfera privata mo per pudair ta mussar reclamas persunalisadas.

Tias Protecziuns da la sfera privata mussan ils fastizaders e cookies che paginas-web han vulì laschar enavos tar tai e quants che Firefox ha bloccà per tai.

En il modus da navigaziun privata stizza Firefox automaticamain infurmaziuns da navigaziun sco per exempel pleds-clav, cookies e tia cronologia, uschia che ti na laschas enavos nagins fastizs en il navigatur suenter avair finì tia sesida. Edge percunter registrescha tia cronologia perfin en il modus privat (numnà «InPrivate»). Uschia èsi relativamain simpel per auters da reconstruir cumplettamain tia cronologia, tuttina sche ti es navigà en il modus regular u InPrivate.

Sch'i sa tracta da criptar datas stattan domadus navigaturs a pèr in cun l'auter. Sche la sfera privata e la transparenza en l'internet ta stattan dentant propi a cor, lura è Firefox cleramain la meglra opziun.

Telechargiar il navigatur Firefox

Funcziunalitad

Funcziunalitad Firefox Edge
Bloccada da la reproducziun automatica Gea Gea
Navigaziun cun tabs Gea Gea
Administraziun da segnapaginas Gea Gea
Emplenescha automaticamain formulars Gea Gea
Opziuns per maschinas da tschertgar Gea Gea
Sintesa vocala Gea Gea
Modus da lectura Gea Gea
Correctura ortografica Gea Gea
«Web extensions»/supplements Gea Gea
Utensil integrà per far maletgs dal visur Gea Gea

Firefox è in spert navigatur open source. Quai munta ch'ils utilisaders al pon persunalisar tenor gust e basegn. Firefox pussibilitescha a ses utilisaders tranter auter dad adattar l'interfatscha cun agid da divers designs e differentas configuraziuns da la trav da simbols. Cunquai che noss navigatur è adina stà open source pudain nus quintar cun blers stupents sviluppaders che han creà ina biblioteca vasta da supplements ed extensiuns per il navigatur.

Dapi che Edge fa diever da la plattafurma Chromium che pretenda bler dal processur, èsi pussaivel ch'il navigatur è daventà in pau pli plaun, surtut sche plirs programs vegnan exequids il medem mument. Abstrahà da quai porscha la plattafurma Chromium in grond dumber dad extensiuns e pussaivladads multifaras dad adattar l'interfatscha che Edge n'aveva betg avant la midada a Chromium.

Edge porscha in pèr funcziuns nizzaivlas da l'interfatscha sco per exempel las previstas dals tabs che pon gidar da chattar il gist tab sch'ins ha avert plirs tabs il medem mument. In'autra funcziun pratica en connex cun ils tabs ta pussibilitescha da metter da la vart tabs averts che ti na vuls betg serrar, malgrà che ti n'als dovras betg per il mument.

L'interfatscha da Firefox pussibilitescha da scrollar en direcziun orizontala tras ils tabs da maniera che las infurmaziuns restan vesaivlas. Uschia na vegnan ils tabs betg reducids a la grondezza da l'icona. Ultra da quai propona noss utensil Pocket artitgels interessants e cuntegn relevant mintgamai cura che ti avras in nov tab. E grazia a Pocket pos ti era memorisar artitgels, videos ed auters cuntegns cun in unic clic per cuntinuar in'autra giada cun la lectura.

Tant Firefox sco era Edge porschan stupents modus per leger. Tar Firefox stos ti mo cliccar sin la pitschna icona en la trav da tschertgar ed il navigatur zuppenta tut ils elements nunnecessaris e ta preschenta in artitgel bain legibel. Tar Edge cliccas ti per quest scopo sin l'icona cun il cudesch e ti survegns ina pagina survesaivla.

Firefox cuntegna era bleras funcziuns praticas preinstalladas sco per exempel ina protecziun avanzada cunter fastizaders (Enhanced Tracking Protection), in instrument integrà per far maletgs dal visur, in program per trametter grondas datotecas ed auter pli.

Firefox cuntegna da bell'entschatta dapli funcziuns ubain preinstalladas en il navigatur u prontas per telechargiar immediatamain. Domadus navigaturs porschan nundumbraivels supplements ed extensiuns, dentant è Edge a la testa areguard la quantitad, grazia a sia cumpatibilitad cun la plattafurma Chromium da Google.

Telechargiar il navigatur Firefox

Portabilitad

Portabilitad Firefox Edge
Disponibel per blers sistems operativs Gea Gea
Disponibel era per sistems operativs mobils Gea Gea
Sincronisaziun cun apparats mobils Gea Gea
Administraziun da pleds-clav Gea Gea
Pled-clav universal Gea Gea

Microsoft ha emprais da sias experientschas cun Internet Explorer areguard l'incumpatibilitad cun autras plattafurmas. Perquai stat Edge ussa a disposiziun sin iOS, Android, Windows, macOS e bainbaud era sin Linux.

Dapi onns stat Firefox a disposiziun sin iOS, Android, Windows, macOS e Linux. Sco quai ch'ins po spetgar dad in navigatur modern pos ti avrir cun Firefox in conto gratuit e sincronisar datas sco per exempel ils pleds-clavs, la cronologia, ils segnapaginas ed ils tabs averts tranter tes computer, tablet u telefon. I funcziuna era da sincronisar tranter differentas plattafurmas.

Edge ta permetta era da connectar tes conto da Microsoft e da sincronisar tes favurits, tia cronologia, tes pleds-clav e dapli tranter tes computer ed apparats dad iOS u Android.

Telechargiar il navigatur Firefox

Evaluaziun cumplessiva

Abstrahà dal fatg che Edge basà sin Chromium occupa fitg il processur, cuntenta il navigatur blers basegns dals utilisaders areguard utilitad e funcziuns. Dentant datti anc in grond potenzial per meglierar la protecziun da la sfera privata. Nossa conclusiun: Firefox è anc adina la meglra opziun per la navigaziun en il mintgadi. Quai na pertutga betg mo la funcziunalitad, dentant era – e quai è pli impurtant – la transparenza davart la rimnada ed il diever da las datas dals utilisaders. Nossa interpresa principala Mozilla è in'organisaziun dad util public ch'è sa deditgada da bell'entschatta a la protecziun da datas ed a la libertad en l'internet. Perquai avain nus simplamain autras prioritads sch'i sa tracta da las datas dals utilisaders.

Schebain che nus recumandain natiralmain dad utilisar Firefox, stos la fin finala ti tscherner tes navigatur – sin basa da tias atgnas experientschas e tes basegns areguard extensiuns, persunalisaziun dal navigatur, sveltezza, sfera privata e segirezza.

La cumparegliaziun è vegnida fatga mintgamai cun la configuraziun da standard, a basa da las suandantas versiuns dals navigaturs examinads:
Firefox (81) | Edge (85)
Questa pagina vegn actualisada duas giadas per quartal per evaluar las novas versiuns. Eventualmain na resguarda ella dentant betg las actualisaziuns las pli novas.