Annexa al manifest da Mozilla

Engaschi per in internet pli saun

L'internet avert e global è la resursa da communicaziun e collavuraziun la pli pussanta mai visa. El è l'incarnaziun dad intginas da las pli fundamentalas speranzas da progress uman. El porscha novas pussaivladads dad emprender cun sviluppar in sentiment d'appartegnientscha a l'umanitad e da schliar problems urgents che pertutgan umans en l'entir mund.

Durant l'ultim decenni è questa empermischun s'accumplida en blers reguards. La pussanza da l'internet augmenta dentant era la separaziun, chaschuna violenza, promova odi e manipulescha fatgs e la realitad. Nus avain realisà che nus stuain formular pli explicitamain nossas finamiras per l'experientscha en l'internet. Quai faschain nus ussa.

  1. Nus ans engaschain per in internet che includa tut ils umans dal mund – en il qual las caracteristicas demograficas dad ina persuna n'influenzeschan betg l'access, las schanzas e la qualitad da l'experientscha online.
  2. Nus ans engaschain per in internet che promova il dialog civil, la dignitad umana e la libertad d'expressiun individuala.
  3. Nus ans engaschain per in internet che stima il pensar critic, discussiuns argumentadas, il barat da savida e la verificaziun da fatgs.
  4. Nus ans engaschain per in internet che encurascha la collavuraziun tranter differentas communitads per ch'ellas possian lavurar ensemen per il bain public.

Il manifest da Mozilla

Noss 10 princips

Emprim princip L'internet è ina part integrala da la vita moderna – ina cumponenta fundamentala en l'educaziun, la communicaziun, la collavuraziun, l'economia, il divertiment e la societad en general.

Ulteriuras infurmaziuns

Segund princip L'internet è ina resursa globala e publica che duai restar averta ed accessibla.

Ulteriuras infurmaziuns

Terz princip L'internet duai enritgir la vita da mintga esser uman.

Ulteriuras infurmaziuns

Quart princip La segirezza e la protecziun da datas da mintga persuna en l'internet è fundamentala e betg facultativa.

Ulteriuras infurmaziuns

Tschintgavel princip Mintga persuna duai avair l'abilitad da dar furma a l'internet ed a las experientschas cun el.

Ulteriuras infurmaziuns

Sisavel princip L'effizienza da l'internet sco resursa publica dependa da ses caracter da cumpatibilitad (protocols, formats da datas, cuntegn), da l'innovaziun e da la participaziun mundiala decentralisada.

Ulteriuras infurmaziuns

Settavel princip Software libra ed open-source promova il svilup da l'internet sco resursa publica.

Ulteriuras infurmaziuns

Otgavel princip Process transparents basads sin la communitad promovan la participaziun, la responsabladad e la confidenza.

Ulteriuras infurmaziuns

Novavel princip La participaziun economica al svilup da l'internet porta blers avantatgs; in equiliber tranter gudogn commerzial ed interess public è decisiv.

Ulteriuras infurmaziuns

Dieschavel princip Accentuar l'util public da l'internet è ina finamira impurtanta ed i vala la paina dad impunder temp, attenziun ed engaschi per quest intent.

Ulteriuras infurmaziuns