Telechargiar Firefox

Firefox na vegn betg pli sustegnì sin Windows 8.1 e pli vegl.

Telechargia per plaschair Firefox ESR (Extended Support Release) per utilisar Firefox.

Firefox na vegn betg pli sustegnì sin macOS 10.14 e pli vegl.

Telechargia per plaschair Firefox ESR (Extended Support Release) per utilisar Firefox.

Las directivas da Firefox per la protecziun da datas

Sfera privata. Utilitad. Portabilitad.

Cumparegliaziun directa da sis dals megliers navigaturs

Tschertgas ti in meglier navigatur? Nus cumparegliain ils navigaturs Firefox, Chrome, Edge, Safari, Opera, Brave ed Internet Explorer in cun l'auter per ta gidar da prender ina decisiun.

In bun navigatur-web duess furnir tut las funcziuns che ti dovras, esser cumpatibel cun tut ils apparats e porscher la protecziun da datas che ti meritas.

Cunquai che tes navigatur è tia porta d'access a l'internet èn sveltezza, segirezza, la protecziun da datas e l'utilitad criteris cardinals. Ils davos onns han blers tschernì Google Chrome sco navigatur. Ma en in temp che reclamas en l'internet ans paran da persequitar dapertut ed i dat adina puspè lingias grassas da sperditas da datas, pretendan blers dapli protecziun da datas e respect da lur navigatur.

Tgenin è pia il meglier navigatur per quai che ti fas en la rait? La schelta dal gist navigatur po influenzar fermamain tia experientscha en il web. Senza far grondas cumparegliain nus ussa ils navigaturs Google Chrome, Firefox, Safari, Opera, Brave, Microsoft Internet Explorer ed Edge – e guardain tgenin che correspunda il meglier a tes basegns.

Segirezza e protecziun da datas

Tgenin navigatur garantescha che datas confidenzialas vegnan protegidas?

Segirezza e protecziun da datas Firefox Chrome Edge Safari Opera Brave
Modus da navigaziun privata Gea Gea Gea Gea Gea Gea
Blochescha cookies da terzas partidas che fastizeschan gia en la configuraziun predefinida Gea Na Gea Gea Gea Gea
Blochescha scripts criptominiers Gea Na Gea Na Gea Gea
Blochescha fastizaders da social media Gea Na Gea Gea Na Gea

Igl è raschunaivel da spetgar in tschert nivel minimal da protecziun da datas dals products che nus utilisain regularmain per ir en l'internet. In navigatur duess almain porscher ina sort da «modus privat» che stizza automaticamain la cronologia da navigaziun ed ils terms tschertgads per che nagin che dovra il medem computer n'haja access a questas datas. En quest connex han tut ils set navigaturs cumparegliads qua fatg in pèr puncts.

Quai che ti fas online reguarda sulettamain tai e nagin auter.

In'autra funcziun dal navigatur che stuess esser ina chaussa evidenta è l'abilitad dad impedir che paginas-web ed interpresas fastizeschian tias disas da navigar e da far cumpras – quai vala era per il modus da navigaziun normal.

In navigatur che blochescha fastizaders da terzas partidas n'è betg mo impurtant per la protecziun da datas – per regla è el era bler pli svelt. Ils blers fastizaders èn mo scripts che vegnan exequids davos las culissas da differentas websites. Ti n'als vesas betg, ma badas ch'els ralenteschan tes navigatur. Dapi la versiun 67 da Firefox vegnan bloccads era improntaders e criptominiers («fingerprinting» e «cryptominers»). Sche ti na sas betg da tge ch'i sa tracta tar criptominiers, qua in exempel che mussa consequenzas tipicas: forsa has ti gia fatg stim ch'il computer sa stgauda andetgamain u che la battaria sa stgargia pli svelt che usità. Quai è savens l'effect secundar da criptominiers che han invas tes apparat.

Funcziunalitad

Tge ha tes navigatur fatg per tai l'ultim temp?

Funcziunalitad Firefox Chrome Edge Safari Opera Brave
Bloccada da la reproducziun automatica Gea Na Gea Na Na Gea
Navigaziun cun tabs Gea Gea Gea Gea Gea Gea
Administraziun da segnapaginas Gea Gea Gea Gea Gea Gea
Emplenescha automaticamain formulars Gea Gea Gea Gea Gea Gea
Opziuns per maschinas da tschertgar Gea Gea Gea Gea Gea Gea
Sintesa vocala Gea Na Gea Gea Na Na
Modus da lectura Gea Gea Gea Gea Na Gea
Correctura ortografica Gea Gea Gea Gea Gea Gea
«Web extensions»/supplements Gea Gea Gea Gea Gea Gea
Utensil integrà per far maletgs dal visur Gea Na Gea Na Gea Gea

Ultra da la protecziun da datas che ha lieu per gronda part davos las culissas dal navigatur èsi impurtant ch'in navigatur porscha in'interfatscha attractiva e funcziuns nizzaivlas. Areguard la navigaziun cun tabs, l'administraziun dals segnapaginas, la cumplettaziun automatica, la controlla da l'ortografia e las extensiuns stattan bunamain tut ils set navigaturs a pèr in cun l'auter. Firefox, Edge ed Opera porschan era ina funcziun intelligenta per far maletgs dal visur che sa mussa sco magari nizzaivla e che manca sche ti midas ad in navigatur che na dispona betg da la funcziun.

Portabilitad

Quant bain funcziunescha tes navigatur sin tuts tes apparats?

Portabilitad Firefox Chrome Edge Safari Opera Brave
Disponibel per blers sistems operativs Gea Gea Gea Na Gea Gea
Disponibel era per sistems operativs mobils Gea Gea Gea Na Gea Gea
Sincronisaziun cun apparats mobils Gea Gea Gea Gea Gea Gea
Administraziun da pleds-clav Gea Gea Gea Gea Gea Gea
Pled-clav universal Gea Na Gea Na Gea Na

L'aspect il pli impurtant da menziunar davart la portabilitad è che betg tut ils navigaturs na funcziuneschan sin tut ils sistems operativs. Entant che Firefox, Chrome, Edge, Brave ed Opera funcziuneschan sin tut ils sistems operativs impurtants e sa laschan installar facilmain, funcziuneschan Internet Explorer e Safari mo sin ils agens sistems da Microsoft resp. dad Apple. La versiun mobila da Safari è preinstallada sin ils apparats dad Apple ed ils blers apparats Android han mintgamai preinstallà in navigatur modifitgà dal producent da l'apparat. Firefox, Chrome, Brave, Edge ed Opera pon vegnir installads facilmain e funcziuneschan schizunt in dasper l'auter sin il medem apparat.

Quasi tut ils navigaturs cumparegliads qua pussibiliteschan la sincronisaziun tranter il computer desktop ed ils apparats mobils. Ti dovras in conto per quest scopo. Cun quel pos ti lura s'annunziar sin tut tes apparats e sincronisar per exempel ils pleds-clav, la cronologia, ils segnapaginas e la configuraziun.

Conclusiun:

Ed il victur è…

Tenor ils criteris surmenziunads – protecziun da datas, utilitad e portabilitad – datti mo in navigatur che correspunda a tut las exigenzas e quai è Firefox. Il punct decisiv n'è betg la funcziunalitad, mabain la protecziun da datas. Firefox è il navigatur il pli fidabel e na ta serra betg en in ecosistem. Ti pos l'utilisar sin tut ils sistems operativs, sin tut ils apparats e quai cun in bun sentiment da segirezza.

Ils navigaturs èn sa sviluppads vinavant signifitgantamain dapi che Chrome è entrà en il martgà ed ha conquistà ina gronda quota al martgà. Ils blers navigaturs moderns han gudagnà terren en connex cun la portabilitad e la funcziunalitad, en tscherts aspects sco la sveltezza e la protecziun da datas han els schizunt superà Chrome. Ma la decisiun per il navigatur optimal per tai dependa natiralmain adina da tes basegns e da quai che ta para il pli impurtant per navigar en l'internet.

La cumparegliaziun è vegnida fatga mintgamai cun la configuraziun da standard, a basa da las suandantas versiuns dals navigaturs examinads:
Firefox (81) | Chrome (85) | Edge (85) | Safari (14) | Opera (67) | Brave (1.14.81)
Questa pagina vegn actualisada duas giadas per quartal per evaluar las novas versiuns. Eventualmain na resguarda ella dentant betg las actualisaziuns las pli novas.

Davos Firefox stat l'organisaziun senza finamira da profit Mozilla.

Per Firefox ha tia sfera privata l'emprima prioritad – en tut quai che nus faschain. Nus essan da l'avis che ti hajas il dretg da decider sez tgeninas da tias datas persunalas che ti vulessas cundivider e cun tgi. Firefox ramassa mo las datas las pli necessarias e na las venda a nagin. Las paucas datas che nus ramassain duvrain nus mo per optimar noss products e nossas funcziuns. Nus n'avain nagins secrets. Per la paja essan nus transparents en noss agir e protegin tias datas per propi.