Manifest Mozilla

Manifest Mozilla, napisany w lěśe 2007, naše głowne principy wobcerjujo. Zlubjenje za strowy internet jo se napisało ako dodank k manifestoju w lěśe 2017, aby naš dłymoki zawězk wótbłyšćujo, aby zawěsćił, až internet luźam a cłowjestwoju ako cełk słužy. Gromaźe toś tej dwa dokumenta źěło pśez Mozilla wóźitej – což wuwijamy, což financěrujomy a kak ako zgromaźeństwo gromaźe źěłamy.

Zapokazanje

Internet jo stawnje wažnjejšy źěl našogo žywjenja.

Projekt Mozilla jo gobalne zgromaźeństwo luźi, kótarež wěrje, až wótwórjonosć, inowacija a móžnosći su kluc wobstawnego derjeměśa interneta. Smy wót lěta 1998 gromaźe źěłali, aby zawěsćili, až internet wuwija se na wašnju, kótaraž jo kuždemu wužytna. Nejwěcej znaty z našych projektow jo webwobglědowak Mozilla Firefox.

Projekt Mozilla zepěra se na zgromaźeństwo, aby wuběrnu softwaru zjawnego žrědła napórał a nowe wašnje kooperacije wuwijał. Załožujomy zgromaźeństwa luźi, kótarež cynje internet k lěpšemu městnoju za nas wšych.

Ako wuslědk toś tych prócowanjow smy rěd principow zestajali, kótarež mamy za kritiske za internet, aby dalej zjawnemu derjeměśeju słužyli a teke komercielnym aspektam žywjenja. Toś te principy pódajomy dołojce.

Cele za manifest su:

  1. wiziju za internet artikulěrowaś, kótaruž załožba Mozilla Foundation ma pó měnjenju sobustatkujucych Mozilla spěchowaś;
  2. luźam se pśigroniś, njeźiwajucy na jich technisku slězynu;
  3. sobustatkujucych Mozilla gjardych na to cyniś, což cynimy a nas motiwěrowaś dalej źěłaś; a
  4. wobłuk za drugich luźi napóraś, aby my toś tu wiziju wó interneśe doprědka spórali.

Toś te principy njezwopšawdnjuju se wót samego. Luźe su trjebne, kótarež cynje internet wótwórjony a k městnoju aktiwnego wobźělenja - luźe, kótarež jadnaju ako jadnotliwce, źěłaju w kupkach gromadu a nawjeduju drugich. Załožba Mozilla Foundation ma nadawk, principy manifesta Mozilla spěchowaś. Pśepšosujomy drugich, se nam pśizamknuś a internet k stawnje lěpšemu městnoju za kuždego cyniś.

Principy

  1. Princip 1
    Internet jo integralny źěl modernego žywjenja — klucowa komponenta w kubłanju, komunikaciji, kooperaciji, pśekupowanju, rozdrosćenju a towarišnosći w cełku.
  2. Princip 2
    Internet jo globalna zjawna resursa, kótaryž musy wótwórjona a pśistupna wóstaś.
  3. Princip 3
    Internet dej žywjenje jadnotliwych luźi wobogaśiś.
  4. Princip 4
    Wěstota a priwatnosć jadnotliwcow w interneśe stej fundamentalnej a njesměju jej ako opcionalnej naglědaś.
  5. Princip 5
    Jadnotliwce muse zamóžnosć měś, internet a swóje dožywjenja w njom wugótowaś.
  6. Princip 6
    Efektiwita interneta ako zjawna resursa wótwisujo wót komunikacije mjazy sobu (protokole, datowe formaty, wopśimjeśe), inowacije a decentralnego wobźělenja swětodaloko.
  7. Princip 7
    Dermotna software z wótwórjonego žrědła spěchujo wuwijanje interneta ako zjawnu resursu.
  8. Princip 8
    Transparentne procese na zakłaźe zgromaźeństwa mócuju wobźělenje, zagronitosć a dowěru.
  9. Princip 9
    Komercielne wobźělenje na wuwiśu interneta pśinjaso wjele lěpšynow; balansa mjazy komercielnym profitom a zjawnym wužytkom jo rozsudna.
  10. Princip 10
    Mócowanje aspektow zjawnego wužytka interneta jo wažny zaměr, kótaryž jo gódny nałožka na casu, zajmowanosći a angažemenśe.

Zlubjenje za strowy internet

Wótwórjony, globalny internet jo nejmócnjejša resursa za komunikaciju a zgromadne źěło, kótaruž gdy smy wiźeli. Symbolizěrujo někotare našych nejdłymšych naźejow za cłowjeski póstup. Bitujo nowe šance za wuknjenje, twórjenje rozměśa za zgromadnu cłowjeskosć a rozwězanje šišćecych problemow, pśed kótarymiž luźe wšuźi stoje.

Za zachadny lětźasetk jo se toś to zlubjenje na wšake wašnje dopołniło. Smy pak teke wiźeli, až se móc interneta teke wužywa, aby rozdwójenje zmócniła, namóc nawlakła, gramotu wubuźiła a z wótglědom fakty a napšawdnosć manipulěrowała. Smy wuknuli, aby my dejali cele za cłowjeske byśe w interneśe jasnjej pśedstajiś. To něnto cynimy.

Naše zawězki

  1. Zawězk 1
    Zastupujomy internet, kótaryž wšykne ludy zemje zappśimujo - źož demografiske kakosći wósoby jeje pśistup online, šance abo kwalitu dožywjenja njepóstajaju.
  2. Zawězk 2
    Zastupujomy internet, až pśistojny wobchad mjaz sobu, cłowjesku dostojnosć a wósobinsku wurazniwosć spěchujo.
  3. Zawězk 3
    Zastupujomy internet, kótaryž kritiske myslenje, pśemyslonu argumentaciju, źělonu wědu a pśeglědujobnu fakty wjelgin cesći.
  4. Zawězk 4
    Zastupujomy internet, kótaryž zgromadne źěło wšakich zgromaźeństwow pógónujo, kótarež za zgromadne dobro gromaźe źěłaju.

Zlubjenje Mozilla

Pśez projekt Mozilla a pśez kuždu organizaciju w swójźbje Mozilla lubimy, manifest Mozilla w jogo aktiwity pódpěraś. Pśedewšym buźomy:

  • technologije wótwórjonego žrědła a zgromaźeństwa wuwijaś a zmóžniś, kótarež pódpěraju principy manifesta;
  • wjelicne produkty za kupcow napóraś a k dispoziciji stajaś, kótarež pódpěraju principy manifesta;
  • aktiwa Mozilla wužywaś (intelektualne swójstwo ako na pś. awtorstwa a wikowe marki, infrastruktura, financielne srědki a mě), aby my internet ako wótwórjonu platformu wobchowali;
  • modele za napóranje ekonomiskich gódnotow k zjawnemu wužytkoju spěchowaś; a
  • principy manifesta Mozilla w zjawnym diskursu a w internetnej branžy spěchowaś.

Trjebamy was, aby manifest doprědka pśinjasli

Internet z toś tymi kwalitami wót samego njenastawa. Luźe a organizacije muse toś te cele k internetnej technologiji a k cłowjeskemu dožywjenjeju z internetom pśinosowaś. Manifest Mozilla a pśidank reprezentěrujotej angažěrowanosć Mozilla za rozšyrjowanje toś tych celow. Mozilla z luźimi a organizacijami wšuźi funkcioněrujo, kótarež kśě internet k hyšći lěpšemu městnoju za kuždego cyniś.

Jolic toś ten cel z nami źěliśo, dajśo nam k wěsći, kak móžomy pomagaś.

A, se wě, napórajomy Firefox a Thunderbird. To wšykno, aby my luźam pomagali, internet k strowemu městnoju cynili.