Telechargiar Firefox

Firefox na vegn betg pli sustegnì sin Windows 8.1 e pli vegl.

Telechargia per plaschair Firefox ESR (Extended Support Release) per utilisar Firefox.

Firefox na vegn betg pli sustegnì sin macOS 10.14 e pli vegl.

Telechargia per plaschair Firefox ESR (Extended Support Release) per utilisar Firefox.

Las directivas da Firefox per la protecziun da datas

Mozilla VPN

Tge è in'adressa IP?

Mozilla respunda tut tias dumondas davart las adressas IP – da tge ch'igl è insumma e co ch'ina adressa IP funcziuna enfin a la dumonda sche ti duessas la zuppentar.

Mintga giada che ti es en l'internet giogan adressas IP ina rolla essenziala en il barat d'infurmaziuns perquai ch'ellas ta pussibiliteschan da vesair las websites che vuls visitar. Per cas che ti na sas betg tge ch'ina adressa IP è insumma, respundain nus las dumondas las pli frequentas qua sutvart.

Tge è in'adressa IP?

Tia adressa IP è in identificatur univoc, cumparegliabel cun ina adressa postala, associada cun tias activitads online. Mintga giada che ti dovras l'internet (per exempel per far cumpras online, trametter e-mails u guardar televisiun via streaming) dumondas ti l'access ad ina tscherta destinaziun specifica en l'internet e per la paja ta vegnan tramessas infurmaziuns. Co funcziuna quai? Curt e bain, IP munta «Internet Protocol» e quel definescha ils standards e las reglas (quai che vegn era numnà «protocol») per adressar datas e stabilir la connexiun cun l'internet. Quest protocol cuntegna las reglas che mintga partida sto resguardar per pussibilitar la circulaziun da datas en omaduas direcziuns.

Qua in exempel dad in'adressa IP che consista dad ina sequenza da quatter cifras ch'èn mintgamai separadas cun in punct: 123.45.67.89
Sche ti tschertgas tia adressa IP, chattas ti insatge uschè.

T'accumpogna l'adressa IP?

Na. Tia adressa IP è mo liada ad in tschert lieu, nun che ti utiliseschias in VPN (nus revegnin pli tard a quai). Sche ti es tar tai a chasa e ta connecteschas cun l'internet per il qual ti pajas, dovras ti ina. Sche ti das dentant in'egliada a tes e-mails a chasa la damaun, legias las novitads en ina ustaria entant che ti spetgas sin tes café e vas alura a lavurar en in biro, has ti duvrà en mintga lieu in'autra adressa IP.

Po tia adressa IP sa midar?

Gea. Schizunt sche ti utiliseschas l'internet mo a chasa po l'adressa IP sa midar per tes dachasa. Ti pos contactar tes purschider d'internet per la midar, dentant po ina simpla reinizialisaziun da tes modem u router causa problems da connexiun cun l'internet avair per consequenza che l'adressa IP sa mida.

Èsi pussaivel che plirs apparats han la medema adressa IP?

Questa dumonda è in pau cumplitgada – la resposta è gea e na. Igl è pussaivel che plirs apparats han la medema adressa IP externa (publica), ma mintga apparat ha sia atgna adressa IP locala (privata). Per exempel definescha tes purschider d'internet per tes dachasa in'adressa IP externa. Cunquai che tes router è l'apparat che ta connectescha effectivamain cun l'internet, vegn l'adressa IP attribuida a tes router. E tes router reparta alura ina adressa IP locala a mintga singul apparat ch'è collià al medem mument cun l'internet. L'adressa IP externa è quella che vegn cundividida cun il mund exteriur. Tia adressa IP locala na vegn betg cundividida ordaifer tia rait privata da chasa.

Èsi pussaivel che las adressas IP èn exaustas in bel di?

Cura che l'internet è vegnì concepì, han ins duvrà adressas da la «versiun 4». Quellas èn da 32 bits, quai vul dir ch'ins avess gì enfin 4,2 milliardas adressas. Quella giada pareva quest dumber suffizient, ma i na basta per bler betg pli en il mund dad ozendi, en il qual ina chasada dals USA dispona en media dad 11 apparats connectads.

Ussa avain nus adressas IP da la versiun 6 che han 128 bits per adressa. Deplorablamain na pon la versiun 4 e la versiun 6 betg communitgar directamain ina cun l'autra, uschia che la glieud vegn anc ditg ad avair basegn dad adressas da la versiun 4.

Èsi necessari da zuppentar l'atgna adressa IP?

Ti na stos betg zuppentar tia adressa IP, ma forsa vulessas ti gugent far quai mintgatant. Il motiv il pli evident è la protecziun da datas. En ils Stadis Unids da l'America ha il Congress annullà las leschas davart la protecziun da datas che avevan l'intent da proteger la sfera privata dad utilisaders da l'internet a bindel lad. Purschiders d'internet pon vesair tias disas da navigar, per tge scopo che ti utiliseschas l'internet e quant ditg che ti visitas mintgamai ina pagina-web. Questa communicaziun n'è betg criptada, uschia che terzas partidas pon vesair tge paginas-web che ti visitas. Ina strategia per far frunt a quest problem è DNS-over-HTTPS (DoH). Questa communicaziun criptescha tes traffic da datas DNS (Domain Name System). Quai renda pli grev a purschiders d'internet da vegnir a savair tge websites che ti emprovas da visitar. Las dumondas DoH dad utilisaders da Firefox en ils USA vegnan transmessas automaticamain via servers DNS fidabels per render pli difficil dad associar las websites visitadas cun ina persuna.

Tut tenor las circumstanzas datti anc auters motivs per zuppentar tia adressa IP. Eventualmain vulessas ti la zuppentar cura che ti es en viadi. In VPN ta po porscher era dapli sfera privata sche ti ta connecteschas cun WLAN per streamar e far cumpras entant che ti exploreschas il mund.

Co pon ins zuppentar l'adressa IP?

In VPN è ina pussaivladad per zuppentar tia adressa IP. Sche ti utiliseschas in VPN deriva tia adressa IP externa da l'adressa externa dal server VPN e betg da l'adressa IP externa da tes lieu actual. Sche tes server connectà sa chatta per exempel en la California, para quai che tia IP externa saja connectada da la California, independentamain da tia posiziun reala. Ultra da quai vegnan tias activitads en l'internet tramessas via ina connexiun segira e criptada a tes server VPN. Quai ta porscha dapli segirezza e sfera privata. Mozilla VPN è ina pussaivladad per zuppentar tia adressa IP. Nus n'arcunain betg la cronologia da tias activitads en la rait e nus na collavurain era betg cun terzas partidas che creeschan profils a basa da quai che ti fas online. Nus offrin ina protecziun cumpletta per maximalmain tschintg apparats cun servers en passa 30 pajais cun ils quals ti pos ta connectar da dapertut.