Mozilla ძირითადი დებულებების დანართი

შეთანხმება ინტერნეტის სიჯანსაღის შესახებ

საყოველთაო და გახსნილი ინტერნეტი არის ჩვენს ხელთ არსებული ყველაზე მძლავრი საშუალება ურთიერთკავშირისა და ურთიერთანამშრომლობისთვის. მისი მეშვეობით შესაძლებელია კაცობრიობის განვითარებისთვის საჭირო მნიშვნელოვანი მიზნების ხორცშესხმა. იგი გზას უხსნის შემეცნებას, ურთიერთდახმარებაზე აგებული ადამიანური გარემოს შექმნასა და იმ დაბრკოლებების გადალახვას, რომელსაც ხალხი ყველგან აწყდება.

უკანასკნელ ათწლეულში ჩვენ ვიხილეთ ამ ყველაფრის არაერთი გამოვლინება. აგრეთვე, კარგად ვნახეთ, თუ რა ძალა აქვს ინტერნეტს განხეთქილების წარმოქმნაში, ურთიერთდაპირისპირების, ძალადობის, შუღლის გაღვივებაში და როგორ შეიძლება მისით საზოგადოებრივ ცხოვრებაზე ზემოქმედება. ამასთან, ჩვენ ვისწავლეთ, რომ უფრო მკაფიოდ უნდა განვსაზღვროთ ჩვენი მისწრაფებები, ინტერნეტის გაჯანსაღებასთან დაკავშირებით. ასეც ვიქცევით.

  1. ჩვენ ვიღწვით ისეთი ინტერნეტის ჩამოყალიბებისთვის, რომელიც სრულად მოიცავს დედამიწის თითოეულ მოსახლეს — სადაც ცალკეული პიროვნებების ინტერნეტთან წვდომადობას, შესაძლებლობებსა და ხარისხს არ განსაზღვრავს მათი საცხოვრებელი ადგილი.
  2. ჩვენ ვიღწვით ისეთი ინტერნეტის შესაქმნელად, რომელიც ხელს შეუწყობს ადამიანებს შორის აზრთა თავისუფალ გაცვლა-გამოცვლას, კეთილშობილურ ურთიერთობებსა და პიროვნების თვითდამკვიდრებას საზოგადოებაში.
  3. ჩვენ ვიღწვით ისეთი ინტერნეტის მხარდასაჭერად, რომელიც აამაღლებს კრიტიკულ აზროვნებას, დასაბუთებული შეხედულებებით მსჯელობას, ცოდნის გაზიარებასა და გადამოწმების ან დამტკიცების შესაძლებლობის მქონე ფაქტების გამოყენებას.
  4. ჩვენ ვიღწვით ისეთი ინტერნეტისთვის, რომელიც გააუმჯობესებს ურთიერთანამშრომლობის შესაძლებლობებს ადამიანთა განსხვავებულ ჯგუფებს შორის, საერთო საზოგადოებრივი სიკეთეების შესაქმნელად.

Mozilla ძირითადი დებულებები

ჩვენი 10 დებულება

დებულება 1 ინტერნეტი არის თანამედროვე ცხოვრების განუყოფელი ნაწილი — მთავარი შემადგენელია განათლების, ურთიერთობის, თანამშრომლობის, საქმიანობის, გართობისა და მთლიანად საზოგადოებრივი ცხოვრების.

ვრცლად

დებულება 2 ინტერნეტი საერთაშორისო საჯარო რესურსია, რომელიც უნდა დარჩეს გახსნილი და საყოველთაოდ ხელმისაწვდომი.

ვრცლად

დებულება 3 ინტერნეტი უნდა იყოს სასარგებლო, თითოეული ადამიანის ცხოვრებისთვის.

ვრცლად

დებულება 4 ინტერნეტში უსაფრთხოება და პირადი ინფორმაციის ხელშეუხებლობა წარმოადგენს ადამიანის ძირითად უფლებებს და ვერ ჩაითვლება მეორეხარისხოვნად.

ვრცლად

დებულება 5 ადამიანებს უნდა ჰქონდეთ შესაძლებლობა მოარგონ ინტერნეტი საკუთარ სურვილებს.

ვრცლად

დებულება 6 ინტერნეტის, როგორც საჯაროდ ხელმისაწვდომი რესურსის სარგებლიანობა განისაზღვრება თავსებადობის დონით (პროტოკოლების, მონაცემთა ფორმატების, შიგთავსის), ინოვაციებითა და მონაწილეების დამოუკიდებლობის ხარისხით, მთელი მსოფლიოს მასშტაბით.

ვრცლად

დებულება 7 უფასო და ღია წყაროს პროგრამებს წვლილი შეაქვს ინტერნეტის, როგორც საჯარო რესურსის მშენებლობაში.

ვრცლად

დებულება 8 გამჭვირვალე, ერთობაზე დაფუძნებული სამუშაო გარემო ზრდის მონაწილეობის სურვილს, პასუხისმგებლობას და ნდობას.

ვრცლად

დებულება 9 კომერციულ ჩართულობას ინტერნეტის შენებაში, მეტი სარგებელი მოაქვს; წონასწორობის შენარჩუნება კი ფინანსურ მოგებასა და საზოგადოებრივ მოგებას შორის გადამწყვეტია.

ვრცლად

დებულება 10 ინტერნეტის სარგებლიანობის გაზრდა არის ის მნიშვნელოვანი მიზანი, რომელზეც ღირს დროის, ყურადღების და გონებრივი რესურსების დახარჯვა.

ვრცლად