¿Mba’e ñanduti kundahára?
Peteĩ ñanduti kundahára ndegueraha oimeraẽva ñanduti rendápe, omoneĩva ehechávo moñe’ẽrã, ta’ãnga ha ta’ãngamýi oimeraẽva tenda arapýpe.
Ñanduti ha’e tembiporu tuicha ha imbaretéva. Heta ary ohasa rire, Ñanduti iñambue mba’éichapa oñemba’apo, mba’éichapa oñeñembosarái ha avei jeiko oñondivegua. Eikuaávo mba’éichapa ojeporu, ombojuaju tetãnguérape, omombarete ñemu rehegua, omoakãrapu’ã jeiko oñondigua, omombarete teko tenonderãgua ha hembiapo opaite meme ojehecháva opaite ára.
Opavave oikekuaava’erã ñandutípe, avei opavave jaikuaapava’erã tembiporukuéra jaiporúva jaike hag̃ua pype. Jaiporu ñanduti kundahára Mozilla Firefox, Google Chrome, Microsoft Edge ha Apple Safari opaite ára, hákatu ¿roikũmby añetete mba’eichagua ha mba’éichapa oku’e? Ndahetái ára, rohasákuri ñemondýipe rohechávo mba’éichapa ñamondokuaa ñanduti veve ambue tapichápe toĩ oĩhápe arapy tuichakue omoambuehápe mba’éichapa ñañamindu’u marandukuéra rehegua. Ndaha’evéima mba’épa reikuaa, tuichavéva ko’ág̃a ha’e mba’e kundahára térã tembiporu’i nde guerahakuaa marandúpe pya’eve.
¿Mba’éicha omba’apo ñanduti kundahára?
Pe ñanduti kundahára ndegueraha ehosehápe ñanduti rupive. Eguerujey marandu ambue ñanduti rendágui ha omoĩta ne mba’erechaha térã nemba’e’oka pumbyryguápe. Marandu ohasa Protocolo de Transferencia de Hipertexto (HTTP) rupive, oikuaáva mba’éichapa ohasáta moñe’ẽrã, ta’ãnga ha ta’ãngamýi ñandutípe. Ko marandu oñemoherakuã ha ojehechauka peteĩ ysaja tapichakuéra ohecha hag̃uáichja oimeraẽva kundahárape, toĩ oĩhápe arapýpe, ikatu ohecha marandu.
Rombyasy, ndaopavavéi kundahára oiporavo pe ysaja oĩháicha. Poruharakuérape, kóva he’ise ñanduti renda omba’apo ha ojehecha ambueháicha. Emoheñói peteĩ tembiapo rembiasakue kundahára pa’ũme, poruharakuéra ikatu hag̃ua oguerohory ñanduti, oimeraẽva kundahára eiporavóva, hérava ñanduti reko’ypy.
Pe ñanduti kundahára orekóvo apopyvusu mba’ekuaarã iñandutíva, oiporu software ojeheróva motor de renderizado omoñe’ẽasa hag̃ua umi mba’ekuaarã moñe’ẽrãme térã ta’ãngápe. Ko’ã mba’ekuaarã ojehai Marcas de hipertexto ñe’ẽme (HTML) ha ñanduti kundaharakuéra omoñe’ẽ ko ayvu omoheñói hag̃ua jahecha, ñahendu ha jajapóva ñandutípe.
Umi hipervínculo omoneĩ poruhárape oguatávo ambue kuatiaroguépe térã ñanduti renda. Peteĩteĩva ñanduti kuatiarogue, ta’ãnga ha ta’ãngamýi oreko imba’etee Localizador Uniforme de Recursos (URL), ojeheróva avei ñanduti kundaharape. Kundahára oiporúrõ mohendahavusu ohekávo mba’ekuaarã, ñanduti kundaharape he’i kundahárape moõpa ohekáta umi mba’eporu oĩva html-pe, he’íva kundahárape mba’e ñanduti kuatiaroguépepa oĩta.
Kookie (ndaha’éi oje’úva)
Umi ñanduti renda oñongatu marandu nde rehegua marandurenda hérava kookie. Oñeñongatu ne mohendahápe eikejey vove tendápe. Ejujeývo, pe ñanduti renda ayvu omoñe’ẽta pe marandurenda oikuaa hag̃ua ndetejeýpa. Techapyrã, eike vove ñanduti rendápe, pe kuatiarogue imandu’a nde poruhára réra ha ñe’ẽñemíre, kóva oikokuaa kookie rupive.
Oĩ avei kookie oguenohẽva marandu nde rehegua. Ikatu pe reipotáva, ne ñanduti kundahára rape, ha hetave. Kóva he’ise pe tenda ome’ẽkuaaha tetepy heseguavéva, heta jey marandu ñemurãguávaramo. Oĩ peteĩchagua kookie, ojeheróva kookie mbohapyháva, oúva tenda eike’ỹha araka’eve upéramo ha ikatúva nderapykueho peteĩ tendágui ambuépe ombyaty hag̃ua marandu nde rehegua, heta jey ojehepyme’ẽva ambue mba’apohaguasúpe. Heta jey ikatu ejoko koichagua kookie, ndahetái kundahára omoneĩva.
Ñemigua ñeikũmby
Opavavenunga kundahára oguereko ñeikundaha ñemiguáva ñemboheko. Oĩ oñomi hag̃ua ñeikundaha rembiasakue ambue poruhárava pe mohendaha rehegua. Heta yvypóra he’i pe ñeikundaha ñemigua térã jekuaa’ỹva ayvu oñomíta ne reraite, avei ne ñeikundaha rembiasakue umi ñanduti me’ẽhárape, tetarekuái ha ñemurãme. Ndojapói péicha. Ko ñemboheko omboguéta pe tembiasakue mohendahágui, iporãva reiporúramo marandu ndereheguaitéva eikuaaukase’ỹva mohendaha oiporukuaáva ambue tapichápe. Firefox ohove ko’ãvagui.
Firefox ne pytyvõ ne ñemigua ñandutípe ojokokuaáva umi tapykuehoha ani hag̃ua nde rapykueho.
Emomba’apo ñanduti kundahára ndéve g̃uarã
Hetave umi ñanduti kundahára tuichavéva omoneĩ poruhárape omoambuévo hapykuere jepysokue rupi térã moĩmbaha. Ko’ã jepysokue ha’e software vore ojuajukuaáva ne kundahárare omboava hag̃ua térã omboajuajúvo tembiapoite. Ko’ã jepysokue ojapokuaa opaichagua mba’e oiko ha omokyre’ỹva, ikatúva tembiapoite pyahu, pytagua ñe’ẽnguéra ñe’ẽryru térã omoambue jehecharã ha téma ojehechakuaáva.
Opavave kundahára apohára omboguata hembiapo ohechauka hag̃ua ta’ãnga ha ta’ãngamýi pya’eve ha syryrýpe, eiporu porã hag̃ua ñanduti. Opavave omba’apo añetehápe poruharakuéra oreko hag̃uáicha kundahára ipya’e, imbarete ha hasy’ỹva ijeporu. Pe iñambueha ha’e mba’érepa. Eiporavova’erã kundahára iporãva ndéve g̃uarã. Mozilla omoheñói Firefox omoañete hag̃ua poruhárape tekorosã oikundahakuévo ha omombarete ñanduti jeporureko opavavépe g̃uarãicha ha ijeike ohupytykuaa hag̃uáicha yvyporakuéra.