Il bloccader da reclamas – in'arma secreta cunter reclamas stentusas.
Uschè bleras reclamas, uschè pauca pazienza… Temp da far ina fin a questa sturnadad.
Ina persuna vesa en media 4'000 reclamas per di. Sche ti es da l'avis che quai saja memia bler è il bloccader da reclamas tes nov meglier ami.
In bloccader da reclamas è ina software che po bloccar reclamas e funcziunescha en duas modas. L'emprima: Il bloccader blochescha il signal dad in server da reclama uschia che la reclama na cumpara mai sin tia pagina. La segunda: I vegnan bloccadas secziuns da la website che pudessan esser reclamas.
Questas reclamas pon esser videos cun tun dad aut, reclamas che ta persequiteschan en l'internet, fastizaders, cookies da terzas partidas e dapli. Per utilisar in bloccader, tschertgar supplements ad blocker disponibels en tes navigatur. Firefox ha per exempel questa glista da supplements da bloccaders approvads. Tscherna da questa glista (u da bloccaders ch'èn approvads per tes navigatur) quel che ta correspunda il pli fitg.
Chatta il bloccader da reclamas che va a prà cun tai
I dat numerus instruments per bloccar cuntegn, ma qua in pèr opziuns fantasticas preschentadas da Mozilla…
uBlock Origin vegn considerà da blers sco il punct da referenza per bloccaders da reclama ed è enconuschent per sia efficacitad ed effizienza. Il program sa lascha persunalisar fitg bain, ma funcziunescha era perfectamain senza adattar la configuraziun.
AdGuard AdBlocker reducescha dapertut las reclamas. Il program blochescha reclamas en il web, en social media ed impedescha era ils pop-ups stentus (ma sche ti tschertgas ina soluziun mo per bloccar pop-ups, tanscha era la bloccada da pop-ups integrada).
Ghostery è in’autra buna tscherna che na blochescha betg mo reclamas, ma porscha era anc pussaivladads per evitar il fastizar.
Questas extensiuns funcziunan perfectamain sin Firefox per computers desktop e per apparats mobils Android.
Creescha ina zona libra da fastizaders cun la bloccada da cuntegn
En Firefox pos ti utilisar ils parameters da la protecziun da datas u da la bloccada da cuntegn per controllar anc meglier ils fastizaders che ta mussan reclamas.
Tscherna tes nivel da protecziun
Per cumenzar, clicca sin il scut a sanestra da la trav d'adressas dad x-ina pagina-web e tscherna «Parameters da protecziun». Quai vegn ad avrir la panela «Sfera privata e segirezza» dals parameters da Firefox en in nov tab. Ti stuessas vesair in pop-up blau cun diversas opziuns.
Cun il modus da standard vai magari simpel
Sche las reclamas na ta disturban betg e sch'igl è tuttina che fastizaders e cookies da terzas partidas ta suondan, stuessan las configuraziuns da standard tanscher per tes basegns. Utilisescha ina fanestra en il modus privat per che fastizaders ta laschian en pasch en il modus da standard.
Rinforza tia defensiun cun il modus strict
Sche memia bleras reclamas ruinan tes di, correspunda il modus strict meglier a tes basegns. Quest modus vegn a bloccar ils fastizaders enconuschents da terzas partidas e cookies en tut las fanestras da Firefox.
Modus persunalisà per far tez
Ils parameters da persunalisaziun ta dattan la schelta maximala. Ti pos decider sez tge bloccar, p.ex. ils fastizaders, cookies ed auter pli. Sche ti permettas cookies dad ina website, ta chattas ti automaticamain en il modus persunalisà.
Zuppenta tes fastizs e blochescha fastizaders
Clicca sin la chaschetta «Fastizaders» e ti pos bloccar fastizaders en duas modas. L'emprima opziun per bloccar fastizaders è da far quai cura che ti lavuras en ina fanestra privata. La segunda è da bloccar fastizaders en tut las fanestras. Considerescha che tschertas paginas na vegnan eventualmain betg chargiadas correctamain sche ti ta decidas dad adina bloccar ils fastizaders.
Mangia si ils cookies
Cookies ta vegnan tramess da websites che ti visitas. Els èn activs sin tes computer ed observan tge che ti fas sin ina website. Sche ina societad aviatica auza per exempel il pretsch perquai che ti has gia dà in'egliada a bigliets da sgol il medem di, è quai l'effect dad in cookie.
En Firefox pos ti bloccar tuts ils cookies da terzas partidas u mo quels endrizzads da fastizaders. Considerescha che la bloccada da tuts ils cookies po disturbar il funcziunament correct da tschertas websites.
Trametta in signal «Do Not Track»
Sche ti na vulessas betg che tes cumportament online vegnia utilisà per reclamas, pos ti trametter in messadi curtaschaivel «Na, grazia!» cun activar l'opziun Betg ma fastizar en Firefox. La participaziun è facultativa, ma las websites che participeschan, chalan immediatamain da ta suandar.
Tempo grazia a bloccadas da reclama
En tscherts cas po ina bloccada da reclamas accelerar tes navigatur. Sch'ina reclama vegn chargiada po quai ralentar ina website. Il medem mument duri pli ditg da chattar quai che ti tschertgas sche ti es fatschentà cun serrar anc ina reclama.
Sche ti vuls savair dapli davart la bloccada da reclamas, i dat tschients dad extensiuns per Firefox ed auters navigaturs che blocheschan reclamas. Sche ti vuls empruvar la bloccada da reclamas che Firefox utilisescha, clicca qua per telechargiar in navigatur per il qual la protecziun da datas ha la prioritad.
