L'internet è daventà indispensabel, cumparegliabel cun electricitad ed aua currenta. Perquai èsi pli impurtant che mai da chattar il meglier navigatur per tai. L'internet è in segund biro, scolast e mintgatant era medi. Perfin sche tes medi real ta scussegliass da consultar il web en cas da sintoms.
Vers mez dals onns 1990 han Netscape, Internet Explorer ed AOL dominà l'internet. Bler era pli simpel cura che la melodia sonora dal modem ans fascheva spetgar cun pazienza fin ch'ina pagina web era finalmain chargiada. Decisiva era da quel temp sulettamain la sveltezza dal navigatur.
Ozendi èsi in pau different. Reclamas, sabotascha da la protecziun da datas, mancos da segirezza e novitads sbagliadas u falsifitgadas pretendan autras qualitads da navigaturs. Co protegia il navigatur tia sfera privata? Permetta el a fastizaders da ta suandar en il web? Dumogna el multitasking ed è el bun dad exequir nundumbraivlas operaziuns tecnicas il medem mument?
Sche ti ta dumondas tge qualitads ch'in navigatur sto avair per proteger tia sfera privata ed esser svelt, datti trais puncts concrets ch'in navigatur duess accumplir.
In navigatur creà per esser svelt.
In navigatur è oravant tut in utensil. Perquai fai senn da tscherner il meglier per tes basegn. Sche ti stos lavurar en la rait per surviver dovras ti in navigatur svelt. En quest connex èsi impurtant da savair ch'in navigatur che cuntegn fastizaders da terzas partidas è probablamain pli plaun che in ch'als blochescha. Fastizaders da terzas partidas èn cookies. Malgrà che ti n'als vesas betg, èn els qua e funcziuneschan davos las culissas da la website e sfarlattan tes temp. Pli blers fastizaders da terzas partidas ch'in navigatur blochescha e pli svelt ch'el po lavurar.
Il suandant è in motiv da plirs per tscherner Firefox: il navigatur Firefox blochescha automaticamain fastizaders da terzas partidas. I dat anc auters motivs che nus menziunain pli tard.
In navigatur che dat la prioritad a la segirezza.
Ta regordas ti da la davosa perdita da datas pli gravanta? Sche quai n'è betg il cas, lur probablamain perquai ch'i capita uschè savens. Firmas arcuneschan datas persunalas e finanzialas da lur clients e hackers las engolan. Sche la segirtad en la rait ha prioritad per tai, lura è in navigatur segir il meglier navigatur per tai.
I dat in pèr pussaivladads co ch'in navigatur po gidar ses utilisaders da sa proteger. In navigatur sin il nivel tecnologic il pli actual è bun da proteger tes computer e websites da visitaders malvis, sco per exempel da malware u virus da computers.
Ultra da quai na duess tes navigatur betg memorisar memia bleras datas d'utilisader. Hackers na pon betg engular insatge che n'exista gnanc. Perquai memorisescha Firefox mo las infurmaziuns necessarias davart ses utilisaders. Firefox sa mo schebain ti utiliseschas il navigatur ed enconuscha tia posiziun geografica approximativa, ma betg il num da tes animal da chasa da tia uffanza u tia colur preferida.
La fin finala duess in navigatur segir porscher utensils che ta gidan da tegnair en egl tes contos d'utilisader. Quai èn per exempel avertiments che ti chattas direct en tia posta entrada en cas ch'in da tes contos è vegnì attatgà u iconas che inditgeschan schebain ina pagina è criptada u betg (e cun quai era sch'igl è ina bun'idea dad endatar il numer da tia carta da credit sin ina pagina da butia).
Firefox porscha in nov servetsch per garantir tia segirtad: Mozilla Monitor. I sa tracta dad ina purschida gratuita che t'avertescha sche in da tes contos d'utilisader èn vegnids attatgads e l'acziun è vegnida a la glisch. Il medem vala per attatgas gia passadas. In auter element bain ponderà è il maschlos verd sisum a sanestra en tia fanestra dal navigatur. Sche ti utiliseschas Firefox e vesas il maschlos verd, vul quai dir che la website è criptada e segira. Sche la serradira è grischa, duessas ti ponderar bain avant che endatar infurmaziuns confidenzialas.
In navigatur che agescha cun discreziun.
La protecziun da datas en l'internet è in tema fitg impurtant. Sche la sfera privata ha la prioritad per tai, duessas ti tscherner in navigatur che piglia serius il tema. Sche ti tschernas in navigatur, dà in tgit en las directivas davart il fastizar e controllescha co ch'il navigatur tracta tias datas. Quai para dad esser ina dumonda plitost tecnica, ma en quest punct sa distinguan ils navigaturs che respectan la protecziun da datas dad auters.
Fastizaders èn tut quels «cookies» mulestus che vegnan menziunads en messadis p.ex. sin paginas-web da societads aviaticas. Quests fastizaders da terzas partidas san nua che ti cliccas e pon analisar tias disas en la rait. In navigatur ch'è bun da garantir tia sfera privata, duess permetter a l'utilisader da deactivar quests fastizaders da terzas partidas. Idealmain fa il navigatur quai gia cun la configuraziun predefinida.
In'autra pussaivladad dad evitar che fastizaders ta suandian è da navigar en il modus privat. Mintga navigatur che pretenda da sai da garantir la sfera privata, duess porscher la navigaziun en il modus privat.
Ina pussaivladad simpla da controllar quai è da visitar la pagina da preferenzas dal cuntegn e las directivas davart la protecziun da datas. La pagina davart la protecziun da datas duess inditgar sche e per tge motivs che tias datas vegnan cundivididas. Perquai èn las directivas davart la protecziun da datas da Firefox facilas da leger e da chattar.
La schelta dal meglier navigatur per tai è cumparegliabel cun la tschertga dad in nov dachasa. Ti vulessas evaluar tias opziuns, far retschertgas ed decider a basa da quai ch'è impurtant per tai.
Nus da Firefox avain lavurà sco nars per sviluppar in navigatur ch'è dubel uschè svelt sco avant e che permetta al medem mument als utilisaders la controlla sur da lur vita online.