Essend che connexiuns cun l'internet giogan ina rolla adina pli impurtanta en nossa vita da mintgadi, daventan era la protecziun da datas e la segirezza online adina pli impurtantas. In VPN – ina rait virtuala privata – po gidar mintgin da stabilir ina connexiun segira e privata cun l'internet. Quella funcziunescha uschia ch'ella creescha in «tunnel» segir tranter tes apparat e l'internet e ta protegia en dus reguards impurtants:
- Cun zuppentar tia adressa IP reala. Quai protegia tia identitad e renda nunenconuschaivla tia posiziun.
- Cun criptar tes traffic da datas tranter tai e tes purschider da VPN uschia che nagin en tia rait locala n'al po decriptar u modifitgar.
Igl è ina bun'idea dad avair per mauns in VPN cura ch'i fa da basegn. Qua in pèr situaziuns che ti n'has eventualmain betg anc considerà, en las qualas in VPN fidabel pudess esser nizzaivel.
1. Ina spassegiada en il parc
Igl è ina sonda en damaun, in di da bellezza e ti es ta tschentà sin in banc en il parc per baiver in café e per dar in'egliada a tias websites da novitads preferidas, guardar in pèr videos e per far in pèr cumpras sveltas online entant che ti stas a sulegl en l'aria frestga. Enstagl da consumar tias datas mobilas limitadas, utiliseschas ti la rait publica da WLAN da tia citad. Quella è bain gratuita e vegn gestida da la citad, damai sto tut esser en urden, u betg? Deplorablamain na pos ti ni esser segir che la rait communala è segira ni ch'i sa tracta insumma da la dretga rait (vesair il proxim punct) ni che la rait è concepida per ta proteger da glieud u organs cun nauschas intenziuns che ta spiuneschan durant che ti es connectà. Sche ti activeschas in VPN po quel gidar da proteger tes apparat da mintgin ch'emprova da spiunar las websites che ti visitas u dad engular tias datas d'access sensiblas entant che ti ruaussas durant x in di da l'emna sin tes banc en il parc.
2. En il quartier
Es ti gia ta connectà cun in hotspot che sa numna C0MCAST-WiFi-77th-St u Verizon3-Hotspot-Baltimore u sumegliant? Quai para in num legitim, u betg? Attenziun. En realitad è mintgin en cas dad endrizzar ina rait da WLAN publica faussa cun in num serius per surmanar la glieud da l'utilisar. La connexiun cun ina rait da WLAN nunenconschenta fa da tai ina victima ideala per spiuns e criminals che vulessan acceder a tes apparat per engular infurmaziuns privatas, installar software nuschaivla u far insatge anc pli nausch. Mozilla VPN po augmentar tia segirezza mintga giada che ti ta connecteschas cun in WLAN public cun impedir che persunas nunenconuschentas vesian datas privatas che vegnan tramessas da tes telefon u laptop. Quai vala per la connexiun cun ina rait da WLAN en cafés, butias, praticas da medis etc.
3. En viadi
Raits avertas da WLAN datti en abundanza cura che ti es en viadi, da bus cun rait, enfin a hotspots en staziuns da tren u l'internet gratuit a l'eroport. Igl è tuttina quant segirs ch'els paran dad esser, tracta quests hotspots da WLAN cun precauziun e disfidanza. Blers da nus fan mintgatant diever da questas connexiuns gratuitas per cumadaivladad, ma tut las ristgas menziunadas en quest artitgel pertutgan mintgina da questas raits da WLAN avertas e betg verifitgadas. Il diever dad in VPN po gidar da proteger tia identitad, il transfer da datotecas ed activitads online cunter glieud malintenziunada ch'emprova da ta spiunar cun agid da la medema rait da WLAN.
4. En vacanzas
Sche ti prendas a fit temporarmain in local per lavurar a distanza u planiseschas las proximas vacanzas cun Airbnb, èsi probabel che WLAN gratuit è inclus. Schizunt sche quest WLAN è protegì cun in pled-clav, n'è questa rait betg automaticamain segira e privata. Per l'ina pudess l'ospitant acceder a la rait per registrar quai che ti fas online. Sch'il pled-clav n'è betg vegnì midà tranter in giast ed il proxim pudess era mintga giast precedent utilisar la medema rait il medem mument sco ti. Ultra da quai avess in giast precedent pudì avair accedì al router per installar ina software ch'al permetta da spiunar a distanza. I dat bler considerar! Per betg renunziar cumplettamain a la rait da WLAN è la meglra idea dad utilisar in VPN fidabel cura che ti connecteschas tes computer, telefon u tablet cun l'internet dad in locutur. Quai vala era per hotels ed albierts.
5. A chasa
Per gronda part na valan ils scenaris surmenziunads betg per tia rait da chasa, premess ch'ella è vegnida installada sco ch'i tutga cun in pled-clav segir e mesiras da segirezza. Quai na vul dentant anc betg dir ch'ils mirs n'hajan betg ureglias.
Cunquai che tes traffic d'internet da chasa circulescha via tes purschider d'internet (ISP) da ed a tes apparats, sa quel nua che ti ta chattas en l'internet. In purschider d'internet po vesair las websites che ti visitas, quant ditg che ti restas sin quellas, tes lieu e tschertas infurmaziuns davart tes apparats. Eventualmain na sa tes purschider d'internet grazia al criptadi betg exactamain tge che ti has fatg sin questas websites (per exempel tge che ti has cumprà, tschertgà u legì), ma el po trair sias conclusiuns sin basa da las websites che ti has visità. Questas datas persunalas pon vegnir utilisadas dals purschiders d'internet per crear profils detagliads da tai. La navigaziun en il modus privat na po betg impedir ch'ils purschiders d'internet vesian nua che ti ta movas en l'internet. I daventa dentant bler pli grev sch'il traffic da web vegn tramess tras in VPN.
Fa la segira che ti chapeschias tge ch'in VPN na fa betg
In VPN è ina mesira da segirezza impurtanta che protegia tias datas privatas avant che quellas circuleschan en l'internet ed el zuppenta era tia adressa IP e gida uschia da proteger tia identitad e posiziun. Il VPN na po dentant betg impedir che ti clichias sin colliaziuns dubiusas, telechargias software nuschaivla u daventias ina victima da fraud via e-mail. La fin finala stos ti anc adina restar precaut per esser segir en l'internet.
Mozilla VPN, in servetsch da VPN fidabel
Il pli impurtant da considerar en connex cun la decisiun per in VPN è la tscherna dad ina interpresa fidabla. Fa la segira che ti chapeschias las cundiziuns d'utilisaziun che ti acceptas. Blers pretendan da porscher ina buna qualitad e da garantir la protecziun da datas, ma blers na tegnan betg pled. Betg tut ils servetschs da proxy e da VPN èn propi segirs e privats. Tscherts protocolleschan tias activitads online per sez pudair vender tias datas ed infurmaziuns ad interpresas da marketing. Auters servetschs emprovan schizunt da ta persvader dad installar software nuschaivla sin tes apparats.
Nus ans avain dà gronda fadia per garantir che Mozilla VPN respectia propi tia sfera privata. E nus na ristgain betg nunponderadamain nossa reputaziun. Mozilla ha in bun num ed è enconuschent per concepir products che gidan da proteger tias datas. Nus respectain noss princips per la protecziun da datas formulads cler e net senza frasas vidas ch'ans permettan d'ans focussar mo sin las datas che nus duvrain per porscher noss servetschs. Ed essend che nus vegnin sustegnids dad ina interpresa cun princips, pos ti ta fidar che nus n'investin ils daners che ti spendas per quest product betg mo per segirezza maximala, mabain era per meglierar l'internet per tuts.