FAQ davart la protecziun da datas da Mozilla

Per nus vegnan ils carstgauns avant il profit.

Ozendi èsi savens grev da savair tge ch'ins po spetgar da programs e servetschs utilisads. La tecnologia che dominescha nossa vita è cumplexa e blers n'han betg il temp da s'occupar dals detagls. Quai vala era per Firefox: Nus vesain che blera glieud ha imaginaziuns fitg differentas da quai che curra e passa en il motor dal navigatur.

Nus da Mozilla respectain e protegin tias infurmaziuns persunalas:

• Nus respectain ina seria da Principis da la protecziun da datas che gidan a prender decisiuns en dumondas che reguardan la protecziun da datas da Firefox sin il computer e dals navigaturs sin apparats mobils.
• Nus rimnain mo quellas datas che nus duvrain per crear products d'emprima qualitad.
• Nus laschain controllar ils utilisaders lur vita digitala e la cundivisiun da lur datas.
• Per nus vala il princip «naginas surpraisas». Quai vul dir che nus faschain tut per che la percepziun ch’ils utilisaders han da Firefox correspundia a la realitad.

Las suandantas dumondas e respostas ta duain gidar a chapir tge che ti ta pos spetgar da Mozilla e Firefox:

Jau dovr Firefox per bunamain tut en l'internet. Vus da Mozilla savais probablamain ina massa sur da mai, navaira?

Firefox, il navigatur sin tes apparat mobil u computer è tia porta en l’internet. Tes navigatur gestescha bleras datas davart las websites che ti visitas, ma questas infurmaziuns restan da princip sin tes apparat. Mozilla, la firma che sviluppescha Firefox, na las rimna betg (danor sche ti ans dumondas da far quai).

Na rimnais vus propi betg mia cronologia?

Mozilla sa pli pauc che quai che ti spetgassas davart la moda e maniera dals utilisaders da navigar en il web. Sco sviluppaders dad in navigatur è quai ina sfida per nus. Per quest motiv avain nus creà utensils che funcziunan cun participaziun voluntara e permettan als utilisaders interessads d’ans dar ina invista en lur navigaziun en il web. Sche ti sincroniseschas tia cronologia tranter differentas installaziuns da Firefox n’avain nus dentant nagin access a quest cuntegn – perquai ch’el è criptà da tes apparat.

I para che tut las firmas en l'internet cumprian e vendian mias datas. Vus n'essas probablamain betg megliers.

Mozilla na venda betg tias datas e nus na cumprain era betg datas davart tai.

In mument, co faschais vus lura raps?

Mozilla n'è betg in'organisaziun ordinaria. Fundada sco project da communitad open source l'onn 1998 è Mozilla ina organisaziun che lavura per la finamira dad in internet pli saun. Las pli bleras entradas recaltgescha la Mozilla Corporation grazia a remuneraziuns entras partenadis dal navigatur-web Firefox cun maschinas da tschertgar e cunvegnas da distribuziun sin tut il mund. Ti pos vegnir a savair dapli davart la moda e maniera co nus gudagnain daners en noss rapport finanzial annual.

Bun, ma tge datas rimnais vus?

Mozilla rimna en la configuraziun predefinida ina quantitad limitada da datas da Firefox ch’ans gida a chapir co las persunas dovran il navigatur. Ti pos vegnir a savair dapli davart il tema en nossa decleraziun davart la protecziun da datas e ti pos leger l’entira documentaziun da questa rimnada da datas.

Nossa documentaziun è publica per che mintgin possia verifitgar che quai che nus schain è vair. Ans fa a savair sche nus stuain meglierar insatge e hajas confidenza che nus na zuppain nagut.

Jau na chapesch insumma nagut da questa documentaziun. Tge vul quai dir per bun rumantsch?

I dat duas categorias da datas che nus rimnain tenor standard en nossa versiun finala da Firefox.

L'emprima numnain nus «datas tecnicas». Questas datas pertutgan il navigatur sez, per exempel il sistem operativ sin il qual el è installà ed infurmaziuns davart errurs e collaps.

La segunda pertutga quai che nus numnain «datas d’interacziun». Questas datas pertutgan las interacziuns da l’utilisader cun Firefox, per exempel il dumber da tabs averts, la configuraziun da las preferenzas u quantas giadas che tschertas funcziuns, sco screenshots u containers, èn vegnidas utilisadas. Nus rimnain questas datas tranter auter per il buttun «Enavos» (la frizza en il chantun sura a sanestra dal navigatur che permetta da turnar ad ina pagina-web precedenta), uschia che nus intervegnin ch’insatgi ha utilisà il buttun, senza che nus retschavain infurmaziuns davart la paginas visitadas.

Rimnais vus dapli datas en versiuns betg definitivas da Firefox?

En in tschert senn. Dasper las datas descrittas survart, retschavain nus tenor la configuraziun da standard rapports dad errurs e collaps en versiuns betg definitivas da Firefox.

Mintgatant rimnain nus en las versiuns betg definitivas era datas supplementaras per in da noss studis. Tscherts studis pretendan per exempel uschenumnadas «datas davart l’activitad web» che pon includer URLs ed autras infurmaziuns davart tschertas websites. Quai ans gida a respunder dumondas specificas per meglierar Firefox, per exempel, co integrar meglier websites popularas en Firefox en ina tschertga lingua.

Las preversiuns da Firefox distribuidas da Mozilla èn plattafurmas da svilup che vegnan savens actualisadas cun funcziuns experimentalas. Nus rimnain dapli datas en preversiuns che en las versiuns definitivas per pudair chapir co che questas funcziuns experimentalas sa cumprovan. Ti pos deactivar la rimnada da questas datas en las preferenzas.

Ma pertge rimnais vus insumma datas?

Sche nus na savain betg co il navigatur sa cumporta u tge funcziuns ch'ils utilisaders dovran, n'al pudain nus betg meglierar e na ta pudain betg porscher il meglier product pussaivel. Nus avain sviluppà utensils per rimnar ed analisar datas ch'ans gidan a prender bunas decisiuns per noss products e permettan a medem temp da resguardar la sfera privata dals utilisaders.

La rimnada da datas ma disturba tuttina. La poss jau deactivar?

Gea, la pussaivladad per ils utilisaders da controllar lur atgnas datas è in da noss princips da la protecziun da datas. Firefox ha ina pagina speziala da preferenzas per la protecziun da datas. Là sa chattan tut las pussaivladads da controllar l'atgna sfera privata en Firefox, era l'opziun da deactivar la rimnada da datas.

Tge esi cun las datas da mes conto?

Nus vulain mo rimnar las datas necessarias e na ta dumandain betg datas che nus na duvrain betg.

Ti na dovras nagin conto per utilisar Firefox. Contos èn necessaris per sincronisar datas tranter differents apparats, ma per quest intent duvrain nus mo ina adressa dad e-mail. Nus na vulain betg savair tes num, tia adressa, il di da naschientscha u tes numer da telefon.

La reclama online fa part da vossa strategia da marketing. Cumprais vus datas da persunas per cuntanscher meglier voss public en mira?

Na, nus na cumprain betg datas da persunas per far reclama persunalisada.

Nus pretendain da noss partenaris da reclama ch'els dovrian mo datas d'emprim maun che websites ed inserents han gia da tut ils utilisaders, per exempel il navigatur e l'apparat utilisà.

Bun, i para che la protecziun da datas as stettia propi a cor.

Exact uschia esi.

Ve a savair dapli tge che Mozilla fa per proteger l'internet.