Adina dapli rauba sensibla e preziusa en nossa vita vegn protegida cun contos online segirads cun pleds-clav – brevs d'amur, dossiers da pazients, contos da banca e dapli. Websites fan diever da proceduras d'annunzia per proteger questas chaussas preziusas. Entant ch'insatgi na po betg acceder a tes conto, na po questa persuna per regla era betg leger tes e-mails u transferir daners da tes conto da banca. Damai che nus vivain nossa vita online, co duessan nus proteger nossas datas d'access?
Curt e bain:
- Utilisescha pleds-clav casuals e mintgamai in auter pled-clav per mintga website
- Fa stim dals signals da segirezza da tes navigatur e na ta fida betg
- Formulescha respostas a las dumondas da segirezza ch'èn uschè fermas sco tes pleds-clav
- Fa diever dad ina administraziun da pleds-clav per crear e tegnair endament pleds-clav a moda pli simpla
- Utilisescha l'autentificaziun en dus pass («two-factor authentication») dapertut nua ch'i va
La vita difficultusa dad in pled-clav
Ils blers access èn ozendi protegids cun in pled-clav. Sch'in attatgader ha tuttenina access a tes pled-clav, po el entrar en tes conto e far tut quai che ti pos far cun tes agen conto. La protecziun dal conto dependa pia directamain da la segirezza da tes pled-clav. E quai munta che ti duessas ponderar a tut las pussaivladads ch'in attatgader pudess avair per sa patrunar dal pled-clav da tes conto:
- Spiunar sche ti l'endateschas sin ina website betg criptada
- L'engiavinar
- Engular ina datoteca che cuntegna tes pled-clav
- Utilisar la funcziun da recuperaziun da pleds-clav per al reinizialisar
- T'engianar da maniera che ti al tradeschas
Per proteger tes conto stos ti evitar uschè bleras da las situaziuns surmenziunadas sco pussaivel. Cunter mintga ristga datti strategias correspundentas.
Tschertga il maschlos en tes navigatur
Igl è simpel dad evitar che attatgaders possian engular tes pled-clav durant che ti t'annunzias sin ina website betg criptada: Ponderescha duas giadas avant ch'endatar tes pled-clav sche ti na vesas betg ina tala icona da maschlos en la trav da l'URL:
Il maschlos munta che la website che ti utiliseschas è criptada uschia che nagin na vesa tes pled-clav, schizunt sch'el ta spiunescha durant che ti navigheschas en la rait (p.ex. in auter utilisader dad in punct d'access WLAN public). Firefox emprova da t'avertir sche ti es per endatar tes pled-clav sin ina website betg criptada.
Tes navigatur ta gida era a giuditgar quant fidabla ch'ina website è per ta proteger cunter il phishing. Cura che ti emprovas da visitar ina website enconuschenta sco phishing site, vegn Firefox (e mintga auter navigatur pli grond) a mussar in avertiment en furma da maletg entir – fa attenziun e ponderescha bain avant che visitar questa website!
En general è la meglra defensiun cunter il phishing da na ta fidar da quai che ti obtegnas, saja quai in e-mail, in messadi da text u in messadi sin tes telefonin. Empè da ta fidar da quai ch'insatgi ta trametta, visita directamain la website correspundenta. Sch'ins ta di per exempel en in e-mail da reinizialisar tes pled-clav da PayPal, na clicca betg sin quel link. Endatescha sez paypal.com en il navigatur. Sche la banca telefonescha, telefonescha enavos.
La diversitad dat forza
Il secret per prevegnir a l'engiavinar, l'enguladitsch u la reinizialisaziun da pleds-clav èn ina massa casualitads. Sche attatgaders emprovan dad engiavinar pleds-clav, fan els savens duas chaussas: 1) Els dovran «dicziunaris» – glistas da pleds-clav derasads che la glieud dovra adina puspè e 2) els engiavinan a bun gartetg. Pli ferm e pli casual che tes pled-clav è e pli pauc probabel èsi che ina da questas tecnicas dad engiavinar al chattia.
Sch'in attatgader engola la banca da datas da pleds-clav dad ina website che ti utiliseschas (sco per exempel LinkedIn u Yahoo), pos ti be midar tes pled-clav per questa website. Quai è nausch, ma il donn po esser bler pli gravant sche ti has gia utilisà il medem pled-clav per autras websites – alura po l'attatgader er acceder a tes contos sin quellas websites. Per limitar il donn, utilisescha adina differents pleds-clav per mintga singula website.
Utilisescha Firefox Monitor per tegnair en egl las adressas dad e-mail associadas cun tes contos. Sche tia adressa dad e-mail cumpara en connex cun ina perdita da datas enconuschenta da ina interpresa, vegns ti avertì e cusseglià per proteger il conto pertutgà.
Dumondas da segirezza: Il num da matta da mia mamma è «Ff926AKa9j6Q»
La fin finala ta permettan las bleras websites da restaurar tes pled-clav sche ti al has emblidà. Per regla pretendan quests sistems che ti respundias insaquantas «dumondas da segirezza» avant che ti pos reinizialisar tes pled-clav. Las respostas a las dumondas correspundentas ston esser gist tuttina secretas sco tes pled-clav. En il cas cuntrari po in attatgader engiavinar las respostas e remplazzar tes pled-clav cun in pled-clav ch'el enconuscha.
La casualitad po esser in problem, perquai che las dumondas da segirezza che websites utiliseschan, dovran savens datas che autras persunas san eventualmain da tai, sco per exempel tes lieu da naschientscha, tes anniversari, ils nums da tes parents u ch'ins chatta las infurmaziuns en funtaunas sco medias socialas. La buna nova è ch'i n'interessa betg la website sche la resposta correspunda a la realitad u betg – ti pos raquintar manzegnas! Ma smanzegna sco ch'i tutga: Dà respostas lungas e casualas a las dumondas da segirezza, sco tes pleds-clav.
Ta lascha gidar da l'administraziun da pleds-clav
Tut quai tuna magari inquietant. L'uman n'è betg fatg per chattar lungas sequenzas da bustabs casuals – da las tegnair endament gnanc da discurrer. Per quest cas datti l'administraziun da pleds-clav integrada directamain en il navigatur. Firefox ta dumonda sche ti vulessas generar in pled-clav unic e cumplex, lura memorisescha el a moda segira las infurmaziuns d'annunzia, a las qualas ti pos adina acceder via about:logins.
Cura che ti es annunzià en Firefox cun tes conto da Firefox, pos ti sincronisar tuts tes apparats ed acceder a tes pleds-clav via in navigatur mobil da Firefox. Ve a savair dapli davart l'utilisaziun da l'administraziun da pleds-clav cun tut sias pussaivladads.
L'autentificaziun en dus pass (2FA)
2FA è ina excellenta pussaivladad per augmentar tia segirezza. Sche ti configureschas in nov conto ta dattan tschertas websites la pussaivladad dad duvrar in «segund factur» per la procedura d'annunzia. Savens munta quai che ti associeschas tes numer da telefon cun tes conto. Suenter che ti has endatà tes pled-clav vegns ti pia dumandà dad endatar in code da segirezza che ta vegn tramess via SMS. Sch'igl avess da gartegiar ad in attatgader dad eruir tes pled-clav, na vegn el tuttina betg dad acceder a tes conto perquai ch'el n'ha betg tes telefon.
Per exempel tes conto da Firefox po vegnir protegì cun 2FA. Qua vegns ti a savair dapli davart questa funcziun.
2FA porscha bler dapli segirezza che sulettamain in pled-clav, ma betg mintga website sustegna questa funcziun. Ti chattas ina glista da websites che sustegnan 2FA sut https://2fa.directory. Ultra da quai datti là er ina glista cun websites che na sustegnan betg 2FA e propostas co ti pos las dumandar da sustegnair la funcziun.
Ferm, multifar e basà sin plirs facturs
Insatge è segir: Nus vegnin a duvrar anc in detg temp pleds-clav per proteger noss contos online. Fa diever da ferms pleds-clav e dovra per mintga singula website in auter pled-clav. Utilisescha en pli in utensil d'administraziun da pleds-clav che ta gida d'als tegnair endament a moda segira. Definescha respostas lungas, casualas per dumondas da segirezza (igl è tuttina sch'ellas correspundan a la realitad u betg). E fa diever da l'autentificaziun en dus pass sin mintga website che sustegna la funcziun.
En l'internet d'ozendi, en il qual vegnan engulads mintga di millis pleds-clav e vendids sin il martgà nair, vali la paina da sa proteger online. Sche ti utiliseschas products da Firefox surpiglian quels tschertas stentas e fadias perquai che tut noss products èn concepids per garantir nossa empermischun areguard la protecziun da datas. E Firefox s'orientescha adina a la missiun da Mozilla, l'organisaziun senza finamira da profit ch'ans sustegna per crear in meglier internet.