Tge è in navigatur-web?
In navigatur-web ta maina dapertut per l'internet enturn e ta pussibilitescha da vesair texts, maletgs e videos da tut il mund.
Il web è in utensil multifar e pussant. Entaifer paucs decennis ha el midà nossa moda da lavurar, giugar e dad interagir in cun l'auter. Tut tenor co nus duvrain l'internet è el bun da colliar naziuns, stimular il commerzi, promover relaziuns e pussibilitar innovaziuns futuras. Ultra da quai ans ha il web purtà bler dapli memes che quai che nus vegnin a duvrar en tut nossa vita.
Igl è impurtant che mintgin haja access al web, ma igl è era decisiv che nus tuts enclegian ils utensils che nus duvrain. Mintga di faschain nus diever da navigaturs-web sco Mozilla Firefox, Google Chrome, Microsoft Edge e Apple Safari. Ma enclegiain nus insumma tge ch'in navigatur è ed en tge maniera ch'el funcziunescha? Entaifer pauc temp avain nus midà noss pensar: L'emprim da tut eran nus gia stut da pudair trametter in e-mail ad insatgi insanua en il mund. Ozendi avain nus tut in'autra idea dad infurmaziuns. La dumonda n'è betg pli quant che nus savain, mabain tge navigatur-web u app ch'ans po furnir il pli svelt l'infurmaziun tschertgada.
Co funcziunescha in navigatur-web?
In navigatur-web ta maina per l'entir internet enturn. El retschaiva infurmaziuns dad autras parts dal web e ta mussa quellas sin tes desktop u tes apparat mobil. Questas infurmaziuns vegnan transmessas cun agid dal Hypertext Transfer Protocol che definescha en tge moda e maniera che texts, maletgs e videos circuleschan en la rait. Questas infurmaziuns ston vegnir cundivididas e visualisadas en in format unitar da maniera che utilisaders da tut ils mund cun ils pli differents navigaturs possian vesair l'infurmaziun.
Deplorablamain n'interpreteschan betg tut ils sviluppaders da navigaturs il format en la medema moda e maniera. Quai ha per consequenza per ils utilisaders ch'ina website po funcziunar e vegnir visualisada differentamain ch'in autra. L'intent da cuntanscher in'unifurmitad da tut ils navigaturs cun la finamira che mintga utilisader possia giudair l'internet independentamain da ses navigatur, sa numna standards dal web .
Cura ch'il navigatur-web retschaiva datas dad in server ch'è collià cun l'internet, dovra el ina software numnada rendering engine. Quella translatescha las datas en text e maletgs. Questas datas vegnan scrittas en furma da Hypertext Markup Language (HTML). Ils navigaturs-web san leger quest code per crear la fin finala quai che nus vesain ed udin en l'internet.
Colliaziuns ipertextualas pussibiliteschan ad utilisaders da suandar in percurs ad autras paginas u websites en il web. Mintga pagina-web, maletg e video ha ses agen Uniform Resource Locator (URL) ch'è unic. Quel vegn era numnà adressa(-web). Cura ch'in navigatur retschaiva datas dad in server, infurmescha l'adressa-web il navigatur-web nua ch'el chatta mintga element descrit en il HTML. Sin quai vegn il navigatur infurmà nua che quel sto vegnir plazzà sin la pagina-web.
Cookies (betg quels ch'ins giauda cun il café)
Paginas-web memoriseschan infurmaziuns da tai en datotecas, numnadas cookies. Quests cookies vegnan memorisads sin tes computer per la proxima giada che ti visitas la medema website. Cura che ti turnas, legia il code da la website questa datoteca e vesa che ti sa tracta da tai. In exempel: Sche ti visitas ina website che sa regorda da tes num d'utilisader e tes pled-clav, funcziuna quai grazia ad in cookie.
I dat era cookies che sa regordan dad infurmaziuns pli detagliadas da tai. Quai pon esser tes interess u tias disas en connex cun l'internet etc. Quai ha per consequenza ch'ina website è buna da ta metter a disposiziun cuntegns individualisads – savens en furma da reclama. I dat tips da cookies, numnads cookies da terzas partidas. Quels derivan da websites che ti na visitas gnanc il mument e ch'èn ablas da suandar tias activitads da pagina a pagina per ramassar infurmaziuns da tai. Questas infurmaziuns vegnan mintgatant vendidas ad autras interpresas. Eventualmain pos ti bloccar quests tips da cookies, ma betg tut ils navigaturs permettan da far quai.
Chapir la protecziun da datas
Quasi tut ils navigaturs impurtants han ina funcziun per proteger tia sfera privata cura che ti navigheschas en l'internet. Questa funcziun zuppa la cronologia da navigaziun dad auters utilisaders che dovran il medem computer. Blers crajan ch'il modus privat u incognito zuppia tant lur identitad sco era lur cronologia da navigaziun davant ils purschiders d'internet, regenzas e firmas da reclama. Quai n'è betg il cas. Questas funcziuns stizzan mo la cronologia sin tes sistem. Quai è nizzaivel sche ti has da far cun datas sensiblas sin in computer che vegn utilisà da pliras persunas u sin in computer public. Firefox va dentant in pass pli lunsch.
Firefox ta gida da proteger meglier tia sfera privata en l'internet. Qua has ti la pussaivladad da bloccar fastizaders che vulan ta suandar en il web.
Adattar il navigatur-web a tes basegns
Ils blers navigaturs-web pli gronds pussibiliteschan ad utilisaders da midar funcziuns cun agid dad extensiuns u supplements. Extensiuns èn tocs da software che ti pos agiuntar a tes navigatur-web per l'adattar a tes basegns u per avair dapli funcziunalitad. Cun agid da talas extensiuns pos ti far da tuttas sorts – rauba divertenta e pratica – sco activar novas funcziuns, dicziunaris da linguas estras u midar l'apparientscha u il design.
Tut ils programmaders da navigaturs vulan sviluppar products ch'èn buns da mussar maletgs e videos il pli svelt pussaivel e quai senza interrupziuns da maniera che ti possias profitar optimalmain da l'internet. Els tuts lavuran intensivamain per garantir als utilisaders che quels hajan in navigatur svelt, cun buna prestaziun ch'è simpel da duvrar. Lur motivs per porscher in tal servetsch èn dentant differents. Perquai èsi impurtant che ti tschernias il navigatur ch'è adattà il meglier a tes basegns. Mozilla sviluppa Firefox per garantir dad ina vart ch'ils utilisaders hajan sut controlla lur vita en l'internet e per garantir da l'autra vart che l'internet saja ina resursa globala e publica che stat a disposiziun ad ina e mintgin.