Pli simpel da cumenzar

Assistent per contos d’e-mail

Pli baud has ti adina stuì savair las configuraziuns da EMAP; SMTP e SSL/TLS da tes server d’e-mails. Ussa stos ti be pli inditgar tes num, tia adressa d’e-mail e tes pled-clav ed immediat po l’assistent d’installaziun da contos d’e-mails chargiar las indicaziuns ord nossa banca da datas.

Cudeschet d’adressas en in clic

Cun il cudeschet d’adressas en in clic pos ti agiuntar a moda fitg simpla persunas a tes cudeschet d’adressas. Clicca simplamain sin l’icona da staila en il messadi che ti retschaivas. Cun dus clics pos ti agiuntar ulteriuras infurmaziuns sco ina fotografia, l’anniversari ed autras infurmaziuns da contact.

Promemoria per agiuntas

La promemoria per agiuntas tschertga il pled agiunta (e pleds sumegliants sco tips da datoteca) en il text dal messadi e ta fa endament dad agiuntar ina datoteca avant che trametter l’e-mail.

Tabs e tschertgar

Tabs

Sche ti lavuras gugent cun tabs en Firefox has ti segiramain era gugent tabs en tes program d’e-mails. Cun tabs pos ti chargiar e-mails en differents tabs e midar senza problems tranter quels. T’imaginescha che ti respundas ad in e-mail e stos mintgatant leger suenter passaschas. Cun tabs pos ti avair avert differents e-mails ed has adina la survista.

Cliccar duas giadas u smatgar enter sin in e-mail avra il messadi en in nov tab. Cun in clic cun la tasta dretga da la mieur sin messadis u ordinaturs pos ti als avrir en il fund davos.

Sche ti serras Thunderbird vegnan tabs averts memorisads e restaurads sche ti avras la proxima giada Thunderbird. Sin la trav d’utensils exista era in menu da tabs per navigar entras ils tabs averts.

Trav per filtrar svelt

La trav per filtrar svelt ta lascha zavrar anc pli spert tes e-mails. Sche ti tippas en il champ da tschertgar vegnan ils resultats mussads directamain. Ti pos era filtrar tes e-mails tenor novs messadis, tags u persunas en tes cudeschet d’adressas. Ti pos era ’fixar’ u memorisar in filter e l’utilisar en differents ordinaturs.

Tschertgar

La surfatscha da tschertgar da Thunderbird cuntegna utensils da filtrar e zavrar per limitar ils e-mails chattads exact sin quels che ti tschertgas. Thunderbird fa in index da tut tes e-mails per che ti pos tschertgar anc pli spert. Ils resultats da la tschertga vegnan averts en in tab per che ti pos adina midar tranter ils resultats ed ils e-mails che ti avras.

Archiv da messadis

Sche ti pensas che ti dovras forsa anc in messadi, vuls dentant betg ch’el resta en tia posta entrada al pos ti archivar. Archivar ta gida dad administrar tia posta entrada e da spustar tes e-mails en in sistem d’ordinaturs.

Cun smatgar il buttun ’Archivar’ u la tasta ’A’ sin tia tastatura pos ti archivar tes e-mails.

Activitads

La fanestra d’activitads registrescha tut las interacziuns tranter Thunderbird e tes provider d’e-mails. Ti stos mai pli engiavinar tge che capita. Ti stos be avrir la fanestrina e vesas tut tge che capita cun tes e-mails.

Persunalisescha il program

Apparientscha da Firefox

Personas, designs simpels, ta lubeschan da midar l’apparientscha visuala da Thunderbird cun be in clic. Tschients da Personas stattan a disposiziun: davent dals films pli novs sur attracziuns da la natira enfin a tattos giapunais chattas tut. Ti pos era tscherner da differents designs cumplets che midan era p.ex. las iconas da Thunderbird.

Ordinaturs gruppads

Cun la funcziun dals ’Ordinaturs gruppads’ pos ti administrar differents contos d’email entras cumbinar ordinaturs spezials sco per exempel la posta entrada, ils e-mails tramess u ils ordinaturs dad archiv. Empè da stuair visitar tut ils ordinaturs da posta entrada da tut tes contos pos ti vesair tut ils e-mails novs en in ordinatur da posta entrada.

Administraziun da supplements

Chatta ed installescha supplements directamain en Thunderbird. Ti na stos betg pli visitar la pagina da supplements per installar tals - avra simplamain l’administraziun da supplements. Na sas betg sch’in supplement è insatge per tai? Valitaziuns, recumandaziuns, descripziuns e maletgs dals supplements ta gidan da prender ina decisiun.

Segirezza per tes e-mails

Sfera privata

Thunderbird protegia tia sfera privata. Perquai vegnan maletgs che vegnan chargiads da funtaunas externas bloccads en tes messadis.

Protecziun encunter phishing

Thunderbird ta protegia dad e-mails che emprovan da retschaiver tias datas persunalas. Sche Thunderbird chatta in tal messadi vegn mussà in avis che quel saja probabel ina emprova da phishing. Plinavant t’avisescha Thunderbird era sche ti cliccas sin in link che maina ad in auter lieu che inditgà en il messadi.

Actualisaziun automatica

Il sistem d’actualisaziun da Thunderbird tschertga automaticamain novas versiuns e t’infurmescha sch’ina actualisaziun stat a disposiziun. Questas actualisaziuns da segirezza èn pitschnas (per ordinari 200KB - 700 KB grondas) e ta dattan dapli segirezza cun be in clic sin ’Installar’. Il sistem d’actualisaziun porscha actualisaziuns automaticas per ils sistems operativs Windows, macOS e Linux, e quai en passa 40 differentas linguas.

Eliminar e-mails nungiavischads

Ils utensils da Thunderbird per eliminar e-mails nungiavischads, uschenumnà SPAM, èn vegnids actualisads per ch’els pon era identifitgar ils pli novs e-mails nungiavischads. Mintga e-mails che ti retschaivas vegn analisà dal filter da spam da Thunderbird. Mintga giada sche ti marcheschas in e-mail sco nungiavischà emprenda Thunderbird e meglierescha il filter. Uschia has ti dapli temps da leger ils e-mails impurtants. Thunderbird po era utilisar il filter da spam da tes provider per spaventar e-mails nungiavischads da tia posta entrada.

Open Source

Thunderbird è il resultat dad in project dad «open source» che vegn sustegni da millis sviluppaders ed experts da segirezza passiunads e versads da tut il mund. Nossa avertadad ed il team activ dad experts gida da garantir che noss products èn pli segirs e vegnan actualisads regularmain.