Firefox daventa adina pli svelt

Co vegn la sveltezza da navigaturs mesirada?

Il benchmark da las prestaziun da navigaturs il pli derasà per mesirar la reacziun dad applicaziuns web sa numna Speedometer. Fertant ch’i dat auters benchmarks da navigaturs, è Speedometer 3 il nov standard per mesirar la sveltezza da tia experientscha da navigaziun. Ils tests recents reflecteschan meglier il web d’ozendi – cun la pussaivladad da lavurar cun diagrams visualmain cumplexs, modifitgar text, interagir cun paginas-web cumplitgadas e pesantas sco paginas da novitads – ed i dat in maletg cumplet da la prestaziun dal navigatur.

Il nov benchmark Speedometer 3 è l’emprim benchmark impurtant sviluppà grazia ad ina collavuraziun da tut ils navigaturs principals, concepì cun la finamira da meglierar l’entir web.

Mintga di pli svelt

Firefox utilisescha il motor da rendering Gecko ch’è abel da gestir stils e layout a moda impressiunantamain svelta. El dispona da funcziuns modernas da JavaScript e sia prestaziun vegn meglierada cuntinuadamain e savens – en favur da nossas utilisadras e noss utilisaders e per meglierar il web.

Tut ils navigaturs han stuì sa meglierar per pudair far buns resultats en il test dal Speedometer 3. Firefox ha fatg spezialmain gronds pass ed è daventà accurschiblamain pli svelt per nossas utilisadras e noss utilisaders, grazia a questa lavur. Firefox è pli spert che mai, cun meglieraziuns da la sveltezza che ti sentas effectivamain. Quai includa che las paginas chargian pli svelt e las interacziuns èn pli fluidas.

Vers in web pli svelt

Mozilla s’impegna da meglierar cuntinuadamain tant l’agen navigatur sco era l’entir web. Perquai ans essan nus engaschads cun collavurar al svilup da Speedometer 3. Questa lavur ha da l’autra vart meglierà la prestaziun da tut ils navigaturs. Independentamain da tia tscherna dal navigatur – Mozilla vul che tes navigatur saja svelt.