Schebain che Internet Explorer da Microsoft è anc adina preinstallà sin ils blers PCs cun Windows, preferiss Microsoft cleramain sche ti utilisassas lur navigatur Edge ch'è definì sco standard sche ti cumpras ussa in tal computer.
Microsoft ha smess da sviluppar sia marca Internet Explorer avant plirs onns a favur da ses navigatur actualisà Edge per Windows 10. Cunquai che Edge è vegnì acceptà mo plaunsieu, è restada ina nischa per Internet Explorer, surtut en fatschentas e per motivs da cumpatibilitad.
Qua cumparegliain nus noss navigatur Firefox cun Internet Explorer areguard segirezza, utilitad e portabilitad. Nus t'explitgain las differenzas tranter in navigatur modern sco per exempel Firefox che correspunda als standards dal web ed il navigatur che ti utiliseschas forsa per scopos commerzials u per spira disa.
Segirezza e protecziun da datas
| Segirezza e protecziun da datas |  |
 |
|---|---|---|
| Modus da navigaziun privata |  |
|
| Blochescha cookies da terzas partidas che fastizeschan gia en la configuraziun predefinida | |
|
| Blochescha scripts criptominiers | |
 |
| Blochescha fastizaders da social media | |
|
Sche ti n'has betg anc bandunà Internet Explorer duess gia la ristga per la segirezza esser in argument persvadent per far quai. Schizunt il responsabel per la segirezza da Microsoft ha avertì milliuns persunas che utiliseschan anc adina Internet Explorer sco lur navigatur principal, ch'els sa mettian en privel.
Microsoft na sviluppescha betg pli vinavant Internet Explorer. Quai munta ch'i dat adina dapli problems gravants da segirezza. Microsoft conceda avertamain ch'i dat mancos da segirezza en praticamain mintga versiun da Internet Explorer.
Tge far sche tia interpresa exequescha anc applicaziuns pli veglias che funcziunan mo cun Internet Explorer? Noss cussegl è da betg confunder la fatschenta cun il divertiment. Nus recumandain l'utilisaziun da l'extensiun da Legacy Browser Support per Windows. Questa extensiun permetta dad avrir automaticamain tschertas URLs definidas en Internet Explorer e da turnar a Firefox per navigar en autras domenas.
Funcziunalitad
| Funcziunalitad | |
|
|---|---|---|
| Bloccada da la reproducziun automatica | |
|
| Navigaziun cun tabs | |
|
| Administraziun da segnapaginas | |
|
| Emplenescha automaticamain formulars | |
|
| Opziuns per maschinas da tschertgar | |
|
| Sintesa vocala | |
|
| Modus da lectura | |
|
| Correctura ortografica | |
|
| «Web extensions»/supplements | |
|
| Utensil integrà per far maletgs dal visur | |
|
Igl è inquietant che 4 fin 5% da l'entir traffic dal web da computers desktop èn succedids via l'Internet Explorer – e quai anc l'onn 2019. Quest dumber para d'esser mo pitschen, quai vul dentant dir ch'i dat anc adina milliuns persunas che fan experientschas negativas cun l'internet. I munta ch'i cuzza ditg per telechargiar e visualisar datas e che paginas-web na vegnan betg mussadas endretg – tut quai ultra dals aspects da segirezza surmenziunads.
Ils unics motivs per utilisar vinavant Internet Explorer èn che sviluppaders vulan guardar co che lur paginas-web vesan ora sin in navigatur pli vegl u sche in'interpresa lavura anc adina cun applicaziuns indispensablas che funcziunan sulettamain cun Internet Explorer.
Da l'autra vart dal spectrum sa chatta Firefox, in dals navigaturs che vegn actualisà il pli savens. Firefox è plain funcziuns nizzaivlas ed interessantas sco Pocket che recumonda cuntegns interessants mintga giada che ti avras in nov tab. Nossa trav unida per adressas e retschertgas u la Quantum Bar, sco nus la numnain, cuntegna era propostas per tai che sa basan sin tes segnapaginas e chavazzins, sin tia cronologia, sin tes tabs averts e sin tias retschertgas preferidas. Ed in conto gratuit da Firefox ta dat l'access a tut tes parameters ed a tes ulteriurs products da Firefox sin mintga apparat – ti stos mo t'annunziar. La fin finala pos ti navigar en tutta calma perquai che ti sas che tes navigatur protegia proactivamain tias datas persunalas.
Portabilitad
| Portabilitad | |
|
|---|---|---|
| Disponibel per blers sistems operativs | |
|
| Disponibel era per sistems operativs mobils | |
|
| Sincronisaziun cun apparats mobils | |
|
| Administraziun da pleds-clav | |
|
| Pled-clav universal | |
|
Cunquai che Microsoft ha decidì ch'i saja uras dad ir per il navigatur Internet Explorer, na datti era nagin sustegn per versiuns dad iOS, talas per Android n'hai mai dà. Sche ti n'utiliseschas ni in laptop ni in desktop cun Windows, munta quai che ti n'has era nagin access a tes segnapaginas, a tia cronologia, tes pleds-clav memorisads ed ad autras datas ch'ils navigaturs moderns sincroniseschan sin tut ils apparats.
Firefox percunter funcziuna sin mintga plattafurma, inclus Windows, macOS, Linux, Android ed iOS. Quai munta che ti pos sincronisar tuttas tias infurmaziuns sin mintga sistem operativ. Sche ti navigheschas pia sin in laptop cun Windows, pos ti cuntinuar cun tes iPhone u tes apparat dad Android là nua che ti avevas smess. Questa funcziun duess esser inclusa en mintga navigatur modern e mussa in deficit fundamental da Internet Explorer.
Evaluaziun cumplessiva
Enfin avant paucs onns era l'Internet Explorer il navigatur il pli popular e derasà sin tut il mund. Dentant èn ils temps sa midads e cun quai era la tecnologia. Mo l'Internet Explorer è restà pli u main il medem navigatur. Schizunt Microsoft supplitgescha explicitamain ils utilisaders da bandunar l'Internet Explorer e da midar enstagl a ses navigatur pli nov Edge che sa basa sin Chromium.
A noss avis duessas ti lavurar cun in navigatur cumprovà che protegia tias datas e ha demussà ch'el porscha ina grondiusa experientscha sin tut ils apparats. En la cumparegliaziun directa è el ord concurrenza. Firefox gudogna senza dubi en tut ils criteris evaluads. Sch'i avess da capitar che ti vas a visitar tes nons e chattas là l'Internet Explorer sin in computer, als fas ti probablamain in bun servetsch cun telechargiar Firefox per els.
La cumparegliaziun è vegnida fatga mintgamai cun la configuraziun da standard, a basa da las suandantas versiuns dals navigaturs examinads:
Firefox (81) |
Internet Explorer (11)
Questa pagina vegn actualisada duas giadas per quartal per evaluar las novas versiuns. Eventualmain na resguarda ella dentant betg las actualisaziuns las pli novas.