Telechargiar Firefox

Firefox na vegn betg pli sustegnì sin Windows 8.1 e pli vegl.

Telechargia per plaschair Firefox ESR (Extended Support Release) per utilisar Firefox.

Firefox na vegn betg pli sustegnì sin macOS 10.14 e pli vegl.

Telechargia per plaschair Firefox ESR (Extended Support Release) per utilisar Firefox.

Las directivas da Firefox per la protecziun da datas

L'istorgia dal project Mozilla

Il project Mozilla è vegnì lantschà l'onn 1998 cun la publicaziun dal code da funtauna dal navigatur Netscape. Igl è stà la finamira da profitar da la creativitad da millis da programmaders en l'internet e da cuntanscher in nivel d'innovaziun anc mai vesì enfin là en il martgà da navigaturs. Gia entaifer l'emprim onn han novs commembers da la cuminanza da tut il mund contribuì a novas funcziuns, meglierà funcziuns existentas ed èn s'engaschads en il manaschament ed en la planisaziun dal project sez.

Creond ina cuminanza averta è il project Mozilla daventà pli grond che mintga autra singula firma. Commembers da la cuminanza èn sa participads ed han extendì la finamira da lur missiun oriunda – empè da cuntinuar simplamain cun il svilup dad ina proxima versiun dal navigatur Netscape, han els creà plirs navigaturs, utensils per sviluppaders e divers auters projects. Bleras persunas han contribuì – mintgin en sia moda – a Mozilla, ma tuts eran passiunads per la creaziun da software libra che pussibilitescha a la glieud ina tscherna libra en connex cun l'internet.

Suenter divers onns da svilup è Mozilla1.0, l'emprima versiun principala, cumparida l'onn 2002. Cun questa versiun èn vegnids divers meglieraments dal navigatur, dal program dad e-mail e dad autras applicaziuns da la suite. Malgrà quai han mo paucs la duvrà. Dal 2002 navigavan dapli che 90% dals utilisaders da l'internet cun Internet Explorer. Mo pauca glieud ha badà quai da quel temp, ma l'emprima versiun da Phoenix (pli tard renumnà en Firefox) è vegnida publitgada er da quel onn da commembers da la cuminanza da Mozilla cun la finamira da porscher la meglra experientscha en l'internet al pli grond dumber d'utilisaders pussaivel.

L'onn 2003 ha il project Mozilla fundà la Mozilla Foundation, in'organisaziun independenta d'util public, sustegnida da singuls donaturs e da diversas firmas. La nova Mozilla Foundation ha cuntinuà cun la lavur quotidiana dad administrar il project ed ha surpiglià uffizialmain la responsabladad per promover l'avertezza, l'innovaziun e las schanzas en l'internet. Ella ha fatg quai cuntinuond a sviluppar software sco Firefox e Thunderbird e s'extendend en novas domenas, offrind servetschs sco il sustegn da meglieraments en connex cun l'accessibilitad dal web senza barrieras.

Firefox 1.0 è cumparì il 2004 ed è daventà in grond success – en stgars in onn è el vegnì telechargià dapli che 100 milliuns giadas. Dapi alura èn cumparidas regularmain novas versiuns da Firefox che battan adina puspè novs records. Grazia a la popularitad da Firefox han utilisaders puspè la pussaivladad da tscherner. La concurrenza reanimada ha accelerà l'innovaziun e meglierà l'internet per ina e mintgin.

Il 2013 avain nus lantschà Firefox OS per purtar tut il potenzial dal web sin telefonins e dar la schelta e la controlla ad ina nova generaziun che scuvra l'internet.

Il 2013 ha Mozilla era festivà ses 15avel anniversari. La cuminanza ha mussà che interpresas commerzialas pon profitar da la collavuraziun cun projects open source e ch'i gartegia da sviluppar products da fitg buna qualitad per il consument final sco software open source. Dapli glieud che mai fa diever da l'internet e l'utilisescha mintgamai en l'atgna lingua. Igl è vegnida creada in'organisaziun perdurabla che tira a niz ils mecanissems dal martgà per sustegnair ina idea d'util public. Quest model è vegnì surpiglià dad auters per crear organisaziuns avertas, transparentas e cooperativas en in champ vast da projects.

Il futur è plain da sfidas e schanzas – sco gia il passà. I na dat nagina garanzia che l'internet restia avert, empernaivel per l'utilisar e segir er en il futur. Mozilla vegn a dar ina vusch als umans er en il futur ed als pussibilitar da viver la vita online tenor lur agen gust e basegn. Cun questa finamira n'essan nus natiralmain betg sulets. La cuminanza da Mozilla exista – sco er auters projects open source ed autras organisaziuns d'util public – mo grazia a glieud engaschada ch'è pronta da realisar nossas finamiras cuminaivlas. Sche ti vuls t'associar a nossa idea ta participescha.

Ulteriuras infurmaziuns davart l'istorgia da Mozilla chattas ti en las suandantas paginas: