Firefox

Navigacion amb localizacion integrada

Firefox pòt dire als sites web ont vos trobatz per que poscatz cercar d'entresenhas mai pertinentas e mai utilas. Vos balha un web mai intelligent e se fa d'un biais que respècta completament vòstra vida privada. Ensajatz-lo !

Fèira de las questions

De qu'es una navigacion que depen de vòstre emplaçament geografic ?

Los sites web qu'utilizan la navigacion que depend de vòstre emplaçament geografic vos demandaràn ont vos trobatz per vos balhar d'entresenhas mai pertinentas o per vos far ganhar de temps de recèrca. Anam dire que cercatz un restaurant prèp d'en çò vòstre. Un site serà capable de vos demandar que partejètz vòstre emplaçament per qu'una simplòta recèrca de “restaurant” vos balhe las responsas que volètz... sens que d'autras entresenhas o de causas en mai a picar vos sián demandadas.

Autre cas : se cercatz una mapa cap a un endrech, lo site web vos dirà d'ont partissètz ; tot çò qu'auretz a far es doncas de dire ont volètz anar.

Aqueste servici es completament opcional (Firefox parteja pas vòstre emplaçament sens que siatz d'acòrdi) e se fa amb lo maximum de respècte de vòstra vida privada. Coma totes los elements de Firefox, l'avèm creat en utilizant las nòrmas estandardas per que los desvolopaires de sites web lo pòscan adoptar aisidament.

Cossí fonciona ?

Quand visitatz un site web que la navigacion depen de vòstre emplaçament geografic, Firefox vos demanda se volètz partejar vòstre emplaçament.

Se acceptatz, Firefox collecta las entresenhas suls punts d'accès inalambrics e l'adreça IP de vòstre ordenador. Firefox manda aquestas entresenhas al gestionari de geolocalizacion per defaut, Google Location Services, per obténer una estimacion de vòstre emplaçament. Un còp fach, aquesta aproximacion es partejada amb lo site que lo demanda.

Se acceptatz pas de partejar aquelas donadas, Firefox mandarà pas res.

Quina precision an los emplaçaments ?

La precision càmbia bravament d'un emplaçament a l'autre. Dins d'unes endreches, podèm èsser precises a d'unes mètres. Ça que la, dins d'autres endreches, pòt èsser mai qu'aquò. Totas las estimacions que nos son tornadas son pas que d'estimacions e ne garantissèm pas la precision. Utilizetz pas aquelas entresenhas dins de situacions d'urgéncia, utilizatz totjorn lo bon sens.

Quinas entresenhas son mandadas e a qual ? Cossí protegissètz ma vida privada ?

Vòstra vida privada es bravament importanta per nosautres e Firefox parteja pas jamai vòstre emplaçament geografic sens que siatz d'acòrdi. Quand visitatz una pagina que demanda d'entresenhas sus vos, Firefox vos demanda abans de partejar quina entresenha que siá amb lo site que lo demanda e lo servici tèrç.

Per defaut, Firefox utiliza Google Location Services per trobar vòstre emplaçament en mandant :

  • l'adreça IP de vòstre ordenador,
  • d'entresenhas suls punts d'accès inalambric prèp d'en çò vòstre,
  • un identificaire de client aleatòri, balhat per Google, que càmbia cada 2 setmanas.

Per aver una descripcion completa de las entresenhas que Firefox collècta e utiliza, legissètz la politica de Firefox sus las donadas privadas (en anglés).

Google Location Services tòrna l'estimacion de vòstre emplaçament geografic (es a dire latitud e longitud). Per aver una descripcion completa de las entresenhas que Google collecta e utiliza, legissèt la la politica de Google Geolocation sus las donadas privadas (en anglés).

Las entresenhas s'escàmbian per una connexion criptada per protegir vòstra vida privada. Un còp que Firefox a vòstras entresenhas d'emplaçament, las manda al site que las demanda. Lo nom o l'emplaçament del site que visitatz, o quin cookie que siá, serà jamai partejat amb Google Location Services.

Ni Mozilla ni Google utilizaràn pas las entresenhas collectadas per Google Location Services per vos identificar o vos espiar.

Per mai d'entresenhas sus çò que lo site que las demanda fa de vòstras entresenhas d'emplaçament, legissètz la politica de vida privada del site web.

Per mai d'entresenhas sus vòstra vida privada, podètz tanben legir la :

Soi seguit quand navigui sus internet ?

Non. Firefox demanda un emplaçament sonque quand un site ne fa la demanda e lo parteja sonque quand l'utilizaire es d'acòrdi. Firefox seguís pas e memoriza pas vòstre emplaçament quand navigatz.

Cossí anullar la permission balhada a un site ?

Se avètz balhar l'autorizacion a Firefox de balhar totjorn vòstre emplaçament a un site e que cambiatz de vejaire pus tard, podètz aisidament anullar vòstra permission. Vaquí cossí cal far :

  • Navigatz sul site qu'a la permission que volètz anullar
  • Anatz dins lo menú Espleches, puèi seleccionatz Entresenhas sus la pagina
  • Seleccionatz l'onglet Permissions
  • Cambiatz lo paramètre de Partejar l'emplaçament

Cossí pòdi desactivar per totjorn la navigacion que depen de l'emplaçament geografic ?

La navigacion que depen de l'emplaçament geografic es totjorn opcionala dins Firefox. Pas cap d'entresenha d'emplaçament es mandada sens que siatz d'acòrdi. Se volètz desactivar aquesta foncion, seguissètz las etapas seguentas :

  • Dins la barra d'adreças, picatz about:config
  • Picatz geo.enabled
  • Fasètz un doble clic sus la preferéncia geo.enabled
  • La navigacion que depen de l'emplaçament geografic es ara desactivada.

Cossí pòdi apondre la presa en carga de la geolocalizacion per mon site web ?

Vòstre servicis pòdon prene en carga la geolocalizacion gràcias a las instruccions disponiblas dins lo centre Mozilla pels desvolopaires.