Lóši započatk

Asistent za připrawjenje póstowych kontow

Prjedy hač je so tuta funkcija zawjedła, dyrbjesće swoje nastajenja za IMAP, SMTP a SSL/TLS wědźeć. Wšitko, štož nětko trjebaće, je waše mjeno, waša e-mejlowa adresa a hesło, a asistent za připrawjenje e-mejlowych kontow so našeje datoweje banki wopraša a e-mejlowe nastajenja za was namaka.

Jednokliknjenski adresnik

Jednokliknjenski adresnik je spěšna a lochka móžnosć, ludźi wašemu adresnikej přidać. Přidajće ludźi z kliknjenjom na hwěžkowy symbol w powěsći, kotruž dóstanjeće. Dwě kliknjeni a móžeće wjace podrobnosćow kaž foto, narodniny a druhe kontaktowe informacije přidać.

Přiwěškowe dopomnjeće

Přiwěškowe dopomnjeće přepytuje tekst wašeje powěsće za słowom „přiwěšk“ (a druhe słowa kaž datajowe typy) a dopomina was, přiwěšk přidać, prjedy hač na Pósłać kliknjeće.

Rajtarki a pytanje

Rajtarki

Jeli rady z rajtarkami Firefox dźěłaće, budźeće zawěsće e-mejlowe rajtarki lubować. E-mejlowe rajtarki začituja waše e-mejlki na separatnych rajtarkach, zo byšće móhł spěšnje mjez nimi tam a sem skakać. Chceće nano na e-mejlku wotmołwić a dyrbiće so na prjedawšu e-mejlku poćahować. E-mejlowe rajtarki dźerža wam wjacore e-mejlki wočinjene, zo byšće na nje lóši přistup měł.

Klikńće dwójce na e-mejlku abo tłóčće zapodawansku tastu a tuta e-mejlka budźe so w nowym rajtarkowym woknje wočinjeć. Klikńće z prawej tastu myški na powěsće abo rjadowaki a wone budu so w rajtarku w pozadku wočinjeć.

Hdyž Thunderbird kónčiće, budu so widźomne rajtarki składować a wobnowjeć, hdyž Thunderbird přichodny raz startujeće. Je tež rajtarkowy meni na rajtarkowej lajsće, zo by wam pomhał, mjez rajtarkami přeńć.

Lajsta spěšneho filtrowanja

Lajsta spěšneho filtrowanja wam zmóžnja, swoje e-mejlki spěšnišo filtrować. Zapisajće słowa do pytanskeho pola spěšneho filtra a wuslědki so hnydom zwobraznjeja. Abo móžeće swoju e-mejl po nowych powěsćach, značkach a ludźoch w swojim adresniku filtrować. Móžeće tež filter „připinać“ abo składować a jón přez wjacore rjadowaki wužiwać.

Pytanje

Pytanski powjerch w Thunderbird wobsahuje filtrowanje a nastroje časoweje lajsty, zo by eksaktnje tutu e-mejlku namakał, kotruž pytaće. Thunderbird indikuje wše waše e-mejlki, zo by wam pomhał, hišće spěšnišo pytać. Waše pytanske wuslědki so w rajtarku zwobraznjeja, tak zo móžeće lochko mjez swojimi pytanskimi wuslědkami a druhimi e-mejlkami tam a sem přeńć.

Archiw powěsćow

Jeli měniće, zo trjebaće e-mejlku w přichodźe, ale chceće ju z póstoweho dochada wotstronić, bjeztoho zo byšće ju zhašał, archiwujće ju! Archiwowanje wam pomha, swój póstowy dochad rjadować a swoju e-mejl w rjadowakowym systemje archiwa zaměstnić.

Přez kliknjenje na tłóčatko „Archiwować“ abo tłóčenje tasty „A“ budźe so waša e-mejl archiwować.

Zrjadowak aktiwitow

Zrjadowak aktiwitow registruje wšě interakcije mjez Thunderbird a wašim e-mejlowym poskićowarjom na jednym městnje. Njetrjebaće hižo hódać. Dyrbiće jenož do jednoho městna hladać, zo byšće wšitko widźał, štož so z wašej e-mejlu stawa.

Přiměrće swoje e-mejlowe dožiwjenje

Wonkowny wobraz

Z tak mjenowanymi „personami“, lochkimi „kožami“ (jendźelsće „skins“), móžeće wonkowny wobraz za Thunderbird hnydom změnić. Sta „kožow“ su k dispoziciji, wot najnowšich filmow, přez sławne zajimawostki hač do japanskich tattoowow. Móžeće tež z wjacorych drastow (jendźelsce „themes“) wubrać, kotrež symbole w Thunderbird porjeńšeja.

Zjednoćene rjadowaki

Zjednoćene rjadowaki wam pomhaja, wjacore e-mejlowe konta rjadować, kombinujo wosebite rjadowaki kaž waš póstowy dochad, Pósłane abo archiwowy rjadowak. Město toho, zo byšće do póstoweho dochada kóždeho e-mejloweho konta šoł, móžeće wšě dochadźace e-mejlki w jednym rjadowaku Póstowy dochad widźeć.

Zrjadowak přidatkow

Namakajće a instalujće přidatki direktnje w Thunderbird. Njetrjebaće hižo websydło přidatkow wopytać - startujće město toho zrjadowak přidatkow. Njejsće sej wěsty, kotry přidatk je prawy za was? Pohódnoćenja, doporučenja, wopisanja a wobrazy přidatkow w akciji wam pomhaja, prawy za was wubrać.

Zawěsće a škitajće swoju e-mejl

Mócna priwatnosć

Thunderbird skići podpěru za wužiwarsku priwatnosć a škit přećiwo wobrazam z interneta. Zo by priwatnosć wužiwarjow zawěsćił, blokuje Thunderbird awtomatisce wobrazy z interneta w e-mejlowych powěsćach.

Škit přećiwo kradnjenju datow

Thunderbird škita was přećiwo e-mejlowym wobšudstwam, kotrež pospytuja wužiwarjow zawjeśc, wosobinske a dowěrliwe informacije přeradźić. Podawa, hdyž powěsć je potencielny pospyt kradnjenja datow. Nimo toho warnuje Thunderbird was, hdyž na wotkaz kliknjeće, kotryž so wočiwidnje k druhemu websydłu wjedźe, hač URL w powěsći podawa.

Awtomatiske aktualizowanje

Aktualizowanski system Thunderbird přepruwuje, hač wužiwaće najnowšu wersiju a da wam powěsć, hdyž wěstotna aktualizacija je k dispoziciji. Tute wěstotne aktualizacije su małe (zwjetša 200 KB - 700 KB), kotrež wam jenož dadźa, štož trjebaće a staraja za to, zo so wěstotna aktualizacija spěšnje sćahuje a instaluje. Awtomatizowany aktualizowanski system stajeja aktualizacije za Windows, macOS a Linux we wyše 40 rozdźělnych rěčach k dispoziciji.

Kónc ze spamom

Woblubowane čaporowe nastroje Thunderbird su so zaktualizowali, zo bychu spamej wo nós dale byli. Kóžda e-mejlka, kotruž přijimaće, přeběži načolne čaporowe filtry. Kóždy raz, hdyž powěsć jako spam markěrujeće, „wuknje“ Thunderbird a polěpšuje swoje filtrowanje, tak zo móžeće wjace časa wužiwać, zo byšće e-mejl čitał, kotraž je wam wažna. Thunderbird móže tež spamowe filtry wašeho e-mejloweho poskićowarja wužiwać, zo by čaporowu e-mejl wot wašeho póstoweho dochada wotdźeržował.

Wotewrjene žórło

Žro Thunderbird je wuwiwanski proces wotewrjeneho žórła, kotryž so wot tysacow pasioněrowanych, nazhonjenych wuwiwarjow a wěstotnych ekspertow z cyłeho swěta doprědka ćeri. Naša wotewrjenosć a aktiwne zhromadźenstwo ekspertow pomhatej zawěsćić, zo naše produkty su wěsćiše a so spěšnje aktualizuja, mjeztym zo nam tež zmóžnjeja, lěpšinu najlěpšich wěstotnych skanowanskich a wuhódnoćenskich nastrojow třećich poskićowarjow wužiwać, zo bychu cyłkownu wěstotu dale powyšili.