Más fácil pa entamar

Encontu de configuración de cuentes de corréu

Enantes d'esta funcionalidá teníes de saber los tos axustes d'IMAP, SMTP y SSL/TLS. Agora tolo que precises ye apurir el to nome, direición de corréu y contraseña, y l'encontu de configuración de cuentes de corréu comprobará la nuesa base de datos y alcontrará los axustes de corréu por ti.

Llibreta de direiciones nun clic

La llibreta de direiciones nun clic ye un mou rápidu y cenciellu d'amestar xente a ella. Amiesta persones primiendo namái nel iconu d'estrella nel mensaxe que recibas. Dos clics y pues amestar más detalles como una semeya, aniversariu y otra información de contautu.

Recordatoriu d’axuntos

El recordatoriu d’axuntos gueta la pallabra axuntu (y otres pallabres como tribes de ficheros) nel cuerpu'l to mensaxe y recuérdate amestar un axuntu enantes de primir Unviar.

Llingüetes y gueta

Llingüetes

Si te presta'l restolar per llingüetes de Firefox, vas amar el corréu per llingüetes. El corréu per llingüetes déxate cargar llingüetes separtaes pa qu'asina pueas dir aína ente elles. Magar que teas respondiendo a un corréu y precises volver a unu anterior. El corréu per llingüetes déxate caltener múltiples llingüetes abiertes pa una referencia cenciella.

Faciendo clic doblu o primiendo enter nun mensaxe de corréu abrirálu nuna llingüeta nueva. Faciendo clic drechu en mensaxes o carpetes abrirálos nuna llingüeta de fondu.

Al colar de Thunderbird, guardaránse les llingüetes visibles y restauraránse cuando abras l'aplicación la próxima vegada. Tamién hai un menú de llingüetes na Barra de ferramientes de Llingüetes p'ayudate a dir ente elles.

Barra de ferramientes de peñera rápida

La barra de ferramientes de peñera rápida permítete peñerar aína'l corréu. Entama teclexando na so caxa de gueta y los resultaos amosaránse nel intre. O pues peñerar el to corréu per mensaxes nuevos, etiquetes y xente na to llibreta de direiciones. Tamién pues «Fixar» o guardar una peñera y usala pente múltiples carpetes.

Gueta

La interfaz de gueta en Thunderbird contién ferramientes de filtráu y cronoloxía pa llocalizar el mensaxe exautu que tas buscando. Thunderbird tamién indexa tolos tos mensaxes p’ayudate a buscar entá más rápido. Los resultaos de gueta amuésense nuna llingüeta pa que puedas alternar ente los resultaos de gueta y el restu del to corréu.

Archiváu de mensaxes

Si camientes que vas necesitar un mensaxe más alantre pero quieslu fuera de la to bandexa d’entrada ensin tener que desanicialu, ¡archívalu! L’archiváu ayúdate a remanar la to bandexa d’entrada y alluga’l to mensaxe nel sistema de carpetes d’archiváu.

Seleicionar el botón Archivar o primir la tecla "A" archivará’l to mensaxe.

Xestor d’actividá

El Xestor d’actividá rexistra toles interaiciones ente Thunderbird y el to fornidor de corréu-e nun únicu llugar. Yá nun tendrás qu’investigar nunca más. Namái tendrás que mirar nun llugar pa saber tolo qu’asocede col to corréu.

Personaliza la to esperiencia de corréu

Aspeutu de Thunderbird

Con Persones, los temes llixeros permítente camudar l’aspeutu de Thunderbird nun momentu. Hai disponibles cientos de temes de les últimes películes, monumentos famosos y tatuaxes xaponeses. Tamién pues escoyer ente dellos temes que camuden dafechu tolos iconos en Thunderbird.

Carpetes intelixentes

Les carpetes intelixentes ayúdente a xestionar múltiples cuentes de corréu, combinando carpetes especiales como la bandexa d’entrada, la carpeta de mensaxes unviaos o la carpeta d’archivos. En cuenta de dir a la bandexa d’entrada de cada una de les tos cuentes de corréu, pues ver tol corréu recibíu nuna sola bandexa d’entrada.

Xestor de complementos

Alcuentra ya instala complementos direutamente en Thunderbird. Yá nun necesites visitar el sitiu web de complementos - en cuenta d’ello, cenciellamente abri’l Xestor de complementos. ¿Nun tas seguru de qué complementu ye l’afayadizu pa ti? Les valoraciones, recomendaciones ya imáxenes de los complementos n’aición puen ayudate na escoyeta.

Asegura y protexe’l to corréu

Privacidá robusta

Thunderbird ufre funciones pa la privacidá del usuariu y la proteición escontra imáxenes remotes. P’asegurar la privacidá del usuariu, Thunderbird bloquia automáticamente les imáxenes remotes nos mensaxes de corréu.

Proteición escontra phishing

Thunderbird protéxete de los fraudes por email qu’intenten engañifar a los usuarios pa qu’entreguen información personal y confidencial indicando cuándo un mensaxe ye un intentu potencial de phishing. Como segunda llinia de defensa, Thunderbird avísate cuando faes clic nun enllaz que paez llevate a un sitiu web distintu del indicáu pola URL nel mensaxe.

Anovamientu automáticu

El sistema d’anovamientu de Thunderbird revisa si tas usando la cabera versión, y avísate cuando hai un anovamientu de seguranza disponible. Estos anovamientos de seguranza son pequeños (normalmente 200KB - 700KB), dándote namái lo que necesites y faciendo que l’anovamientu de seguranza seya rápidu de descargar ya instalar. El sistema d’anovamientu automáticu apurre anovamientos pa Thunderbird en Windows, Mac OS X y Linux en más de 40 llingües distintes.

Separtando dafechu la puxarra

Les populares ferramientes escontra’l corréu punxarra de Thunderbird tán anovaes pa siguir per delantre del spam. Cada mensaxe que recibes pasa peles más modernes peñeres de corréu non deseáu de Thunderbird. Cada vegada que conseñes un mensaxe como spam, Thunderbird "deprende" y meyora’l so filtráu pa que puedas pasar más tiempu lleendo los mensaxes qu’importen. Thunderbird tamién pue usar los filtros de spam del to fornidor de corréu pa caltener el corréu non deseáu llonxe de la bandexa d’entrada.

Códigu abiertu

Nel corazón de Thunderbird hai un procesu de desendolcu de códigu abiertu impulsáu por miles de desendolcadores y espertos de seguranza apasionaos y esperimentaos distribuyíos per tol mundu. La nuesa tresparencia y la Comunidá ayuda a asegurar que los nuesos productos son más seguros y anovaos rápidamente, al empar que permítenos sacar partíu de les meyores ferramientes de terceros pa evaluar y guetar problemes de seguranza qu’ameyoren entá más la seguranza nel so conxuntu.