Annexa al manifest da Mozilla
Engaschi per in internet pli saun
L'internet avert e global è la resursa da communicaziun e collavuraziun la pli pussanta mai visa. El è l'incarnaziun dad intginas da las pli fundamentalas speranzas da progress uman. El porscha novas pussaivladads dad emprender cun sviluppar in sentiment d'appartegnientscha a l'umanitad e da schliar problems urgents che pertutgan umans en l'entir mund.
Durant l'ultim decenni è questa empermischun s'accumplida en blers reguards. La pussanza da l'internet augmenta dentant era la separaziun, chaschuna violenza, promova odi e manipulescha fatgs e la realitad. Nus avain realisà che nus stuain formular pli explicitamain nossas finamiras per l'experientscha en l'internet. Quai faschain nus ussa.
- Nus ans engaschain per in internet che includa tut ils umans dal mund – en il qual las caracteristicas demograficas dad ina persuna n'influenzeschan betg l'access, las schanzas e la qualitad da l'experientscha online.
- Nus ans engaschain per in internet che promova il dialog civil, la dignitad umana e la libertad d'expressiun individuala.
- Nus ans engaschain per in internet che stima il pensar critic, discussiuns argumentadas, il barat da savida e la verificaziun da fatgs.
- Nus ans engaschain per in internet che encurascha la collavuraziun tranter differentas communitads per ch'ellas possian lavurar ensemen per il bain public.
Noss 10 princips
-
Emprim princip
L'internet è ina part integrala da la vita moderna – ina cumponenta fundamentala en l'educaziun, la communicaziun, la collavuraziun, l'economia, il divertiment e la societad en general.
-
Segund princip
L'internet è ina resursa globala e publica che duai restar averta ed accessibla.
-
Terz princip
L'internet duai enritgir la vita da mintga esser uman.
-
Quart princip
La segirezza e la protecziun da datas da mintga persuna en l'internet è fundamentala e betg facultativa.
-
Tschintgavel princip
Mintga persuna duai avair l'abilitad da dar furma a l'internet ed a las experientschas cun el.
-
Sisavel princip
L'effizienza da l'internet sco resursa publica dependa da ses caracter da cumpatibilitad (protocols, formats da datas, cuntegn), da l'innovaziun e da la participaziun mundiala decentralisada.
-
Settavel princip
Software libra ed open-source promova il svilup da l'internet sco resursa publica.
-
Otgavel princip
Process transparents basads sin la communitad promovan la participaziun, la responsabladad e la confidenza.
-
Novavel princip
La participaziun economica al svilup da l'internet porta blers avantatgs; in equiliber tranter gudogn commerzial ed interess public è decisiv.
-
Dieschavel princip
Accentuar l'util public da l'internet è ina finamira impurtanta ed i vala la paina dad impunder temp, attenziun ed engaschi per quest intent.